غزني پوهنتون کې د غزني ولایت پوهنې ریاست د (۳۳۲) پنځم او شپږم خالي بستونو ازموینه واخېستل شوه.
ورځ: چهارشنبه
نېټه: شعبان المعظم ۶مه، ۱۴۴۶ هـ.ق
سلواغې ۱۷مه، ۱۴۰۳ هـ.ش
۵ فبروري ۲۰۲۵ میلادی
نن ورځ په غزني پوهنتون کې د دغه ولایت د پوهنې ریاست اړوند د پنځم او شپږم خالي بستونو ازموینه د یاد پوهنتون د رهبرۍ او مسؤلینو، د غزني ولایت د پوهنې ریاست د مسؤلینو او د ازموینو ملي ادارې څخه د راغلي پلاوي په شتون کې واخېستل شوه.
د یادې ازموینې د پیل په مراسمو کې د غزني پوهنتون عمومي رئیس الحاج مولوي عبدالواسع منصور ګډونوالو ته د ازموینې د پروسې اړوند وینا وکړه او زیاته یې کړه چې ازموینه د شفافیت، عدالت او رقابتي اصولو په پام کې نیولو سره تنظیم شوې، تر څو وړ او مسلکي کادرونه د پوهنې سیستم ته جذب شي. او زیاته یې کړه چې دوی په هر وخت کې د پوهني ریاست سره د هر ډول علمي همکاریو ترسره کولو ته ژمن دي.
ورپسې د یاد ولایت د پوهنې رئیس غونډي ته په وینا کې د غزني پوهنتون له رهبرۍ څخه د هر ډول او تلپاتي علمي همکاریو مننه وکړه. او همدارنګه یې د ازموینې د ترسره کولو پر مهال د علمي رقابتونو پر اهمیت ټینګار وکړ. نوموړي زیاته کړه چې دا ډول ازموینې د شایستهسالارۍ د ترویج لپاره حیاتي ارزښت لري.
ورپسې د ازموینو ملي ادارې څخه راغلي پلاوي مسؤل خبرې وکړې. او د ازموینو د ملي ادارې لاسته راوړنې او کړنې یې له ګډونوالو سره شریک کړل او زیاته یې کړه چې دا پروسه په پوره شفافیت او د ټولو اصولو او مقرراتو پر بنسټ ترسره کېږي، د هیچا حق به ضایع نه شي، او یوازې وړ او شایسته کادرونه به جذب شي.
د یادونې وړ ده چې غزني ولایت پوهنې ریاست د تحصیلي کادرونو جذب ته ژمن دی او د علمي ظرفیتونو د لوړولو لپاره منظمې ازموینې اخلي.
نشراتو او عامه اړیکو عمومي مدیریت
