د لوړو زده کړو وزارت د نظارت او ارزونې هیئت د غزني پوهنتون د علمي او اداري چارو هر اړخیزه ارزونه ترسره کړه.

د لوړو زده کړو وزارت د نظارت او ارزونې هیئت د غزني پوهنتون د علمي او اداري چارو هر اړخیزه ارزونه ترسره کړه. دغه ارزونه د تدریسي بهیر، اداري فعالیتونو، محصلانو ته د خدماتو وړاندې کولو، د کیفیت د لوړوالي، او د پوهنتون د عمومي کاري وضعیت د ښه والي په موخه ترسره شوه.
یاد هیئت د پوهنتون د ریاست مقام په شمول د څلور ګونو معاونیتونو او ټولو پوهنځیو او اداري څانګو ارزونه ترسره او د ارزونې پرمهال یې له اړوندو مسؤلینو سره لیدنې وکړې او د شته امکاناتو، لاسته راوړنو او ننګونو په اړه یې معلومات راټول کړل.
وروسته له ارزونې، د هیئت له لوري د ارزونې پایلې او سپارښتنې د غزني پوهنتون له رهبرۍ سره شریکې او د غزني پوهنتون د رهبرۍ کړنې یې وستایلې او زیاته یې کړه چې دغه پوهنتون په علمي برخه کې زیاتې لاسته راوړنې درلودې؛ او همداراز یې د پوهنتون له رهبرۍ هر اړخیزه مننه وکړه چې د ارزونې پرمهال یې له دوی سره منظم او پر وخت اسناد او شواهد شریک او غوره مېلمه پالنه یې وکړه.
په ورته مهال د پوهنتون مسؤلینو د هیئت له ارزونې هرکلی وکړ او ډاډ یې څرګند کړ چې د چارو د لا ښه والي او شته ستونزو د حل لپاره به لا خپلو هڅو او کوششونو ته ادامه ورکوي.
د یادونې وړده چې د لوړو زده کړو وزارت د نظارت او ارزونې دا لړۍ د هېواد په تحصیلي بنسټونو کې د علمي کیفیت د لوړولو، روڼتیا او اغېزمن اداري نظام د پیاوړتیا په موخه دوام لري.

د نشراتو او عامه اړیکو عمومي مدیریت 
پنج شنبه
۱۴۴۷/۱۲/۴هـ.ق
۱۴۰۵/۰۲/۳۱هـ.ش
۲۰۲۶/۰۵/۲۱م