غزني پوهنتون کې محصلینو ته د فکري ودې په موخه د اسلام له نظره د صبر او توکل فضیلت، پر روان یې اغېزې او پر ځان باور تر سرلیک لاندې معلوماتي سمینار ترسره شو.
غزني پوهنتون کې د محصلانو چارو معاونیت له لوري د محصلینو د فکري او روحي ودې په موخه "د اسلام له نظره د صبر او توکل فضیلت، پر روان یې اغېزې او پر ځان باور" تر عنوان لاندې معلوماتي سمینار ترسره شو.
یاد سمینار د دوو تنو استادانو، له لوري وړاندې شو، چې لومړۍ برخه يې د ښونې او روزنې پوهنځي استاد پوهنمل حسن خان درمل پر ځان باور موضوع هر اړخیزه تشریح کړه او زیاته یې کړه چې پر ځان باور د بریالیتوب بنسټ دی او که یو انسان له صبر او توکل سره یو ځای پر ځان باور هم ولري، نو کولی شي خپل هدفونه په اسانه تر لاسه کړي.
وروسته د شرعیاتو پوهنځي رئیس مولوي عبدالمنان البدر د صبر او توکل موضوع د اسلامي لارښوونو له مخې تشریح؛ او ویې ویل چې صبر د انسان د شخصیت په پیاوړتیا کې مهم رول لري او توکل انسان ته ذهني سکون او د ستونزو پر وړاندې د مقابلې ځواک وربخښي، همداراز یې د صبر او توکل پر رواني اغېزو خبرې و کړې، او څرګنده یې کړه چې دغه ارزښتونه د اضطراب، نا امیدۍ او ذهني فشارونو په کمولو کې مهم تاثیر لري.
په پای کې یې له محصلینو غوښتنه وکړه چې د اسلام له دغو ارزښتناکو اصولو څخه په خپل ورځني ژوند کې ګټه واخلي، څو په علمي ډګر کې بریالي او هم سالمه ټولنه رامنځته کړي.
د نشراتو او عامه اړیکو عمومي مدیریت
نېټه: چهارشنبه
۱۴۴۷هـ.ق، شوال المکرم ۸۲ مه
۱۴۰۵هـ.ش، حمل ۲۶ مه
۲۰۲۶م، اپریل ۱۵ مه
