غزني پوهنتون کې د محصلینو د هڅونې او تشویق په موخه معلوماتي ناسته ترسره شوه.
قمري نېټه: ربیع الاول ،٣، ۱۴۴۷ هـ.ق
لمريز نېټه: سنبله، ٥ ، ۱۴۰۴ هـ.ش
مېلادي نېټه: اګست، ٢٧ ، ۲۰۲۵م
غزني پوهنتون کې د محصلانو چارو د مرستیال مفتي عزت الله نوري له لوري د محصلینو د علمي هڅونې او تشویق په پار ځانګړې معلوماتي ناسته ترسره شوه، چې پکې ګڼ شمېر محصلینو ګډون کړی و.
په دغه ناسته کې ښاغلي نوري محصلینو ته وویل چې باید د خپلو زده کړو ترڅنګ د څېړنې، نوښت او علمي فعالیتونو پر لور لا ډېره توجه وکړي، تر څو د ټولنې په پرمختګ کې رغنده ونډه ولري.
او زیاته یې کړه چې موږ هڅه کوو چې د محصلینو وړتیاوې لا پسې وغوړوو او هغوی وهڅوو چې د زده کړو او نورو مهارتونو ترڅنګ د ورزش په برخه کې هم اغېزمن رول ولوبوي. او غوښتنه یې ورڅخه وکړه چې خپل صورت او سيرت اصلاح او پنځه وخته د جماعت پابنده واوسي.
محصلینو د داسې ناستو په ترسره کېدو خوښي وښوده او دا یې د محصلینو د فکر د غوړېدو، هڅونې او لاسته راوړنو د ودي لپاره مهم ګام وباله.
دغه معلوماتي ناسته د یو لړ علمي او روزنیزو پروګرامونو برخه ده، چې غزني پوهنتون یې د محصلینو د ظرفیت لوړولو او د هغوی د معنوي هڅونې لپاره پلان کړي دي.
د نشراتو او عامه اړیکو عمومي مدیریت
