غزني پوهنتون کې د کرنې پوهنځي محصلینو ته د کرنیزو سټنډرډونو د پېژندنې او ترویج په موخه یو ورځنی معلوماتي سمینار ترسره شو.

غزني پوهنتون کې د کرنې پوهنځي په نوښت، د دغه پوهنځي ګڼ شمېر محصلینو ته د کرنیزو سټنډرډونو (معیارونو) او کرنیزو عصري سیستمونو د پېژندنې او ترویج په موخه یو ورځنی معلوماتي سمینار ترسره شو. د سمینار موخه د معیاري کرنې د اصولو، نويو ټکنالوژیو او پرمختللو کرنیزو سیستمونو سره د محصلینو بلدتیا وه، څو وکولای شي په عملي ډګر کې اغېزمن رول ولوبوي.
د سمینار د پیل پرمهال د یاد پوهنځي رئیس پوهنمل ثابت احمد باوري د کرنيزو سټنډرډونو او عصري کرنیزو سیستمونو په اړه معلومات وړاندې کړل؛ او محصلین یې وهڅول چې باید له نړیوالو کرنیزو معیارونو سره ځانونه بلد او د هېواد د کرنیز سکتور په وده او ځان بسیاینې کې فعاله ونډه واخلي.
وروسته سمینار د هیواد د معیار او کیفیت ملي ادارې د څېړنو او مطالعاتو رئیس انجنیر ډیپلوم هارون باوري له لوري وړاندې شو چې پرمهال يې محصلینو ته د کرنیزو سټنډرډونو پر پېژندنه، اهمیت، د تولید د کیفیت لوړولو، د اوبو د مؤثر مدیریت، او د عصري کرنیزو وسایلو پر کارونې او د اقلیمي بدلونونو اغېزې او د هغو پر وړاندې د نويو کرنیزو میتودونو په اړه يې اړخیز معلومات وړاندې کړل.
په پای کې سمینار په پوښتنو او ځوابونو باندې پای ته ورسېد او محصلینو د موضوعاتو په اړه خپلې پوښتنې  شریکې کړې.

د نشراتو او عامه اړیکو عمومي مدیریت
نېټه: شنبه
۱۴۴۷هـ.ق، شوال المکرم ۲۴ مه
۱۴۰۵هـ.ش، حمل ۲۲ مه
۲۰۲۶م، اپریل ۱۱ مه