غزني پوهنتون کې د محصلینو د ژبنیو مهارتونو د لوړولو په موخه د انګلیسي ژبې کورس د پیل لپاره له یو شمېر محصلینو څخه عمومي ازموینه واخیستل شوه.

غزني پوهنتون کې د محصلانو چارو معاونیت له لوري د محصلینو د ژبنیو مهارتونو د لوړولو په هدف د انګلیسي ژبې د ځانګړي روزنیز کورس د پیل لپاره عمومي ازموینه واخیستل شوه. دغه ازموینه چې د یو شمېر محصلینو په ګډون ترسره شوه، موخه یې د ګډونوالو د اوسنۍ علمي کچې ارزونه او د هغوی د اړتیاوو پر بنسټ د مناسب درسي پروګرام تنظیمول و.
په ورته مهال د محصلانو چارو مرستیال مفتي عزت الله نوري، د ژبنیو مهارتونو او نویو ژبو د زده کولو په اهمیت خبري وکړې او زیاته یې کړه  چې د انګلیسي ژبې زده کړه د معاصرې نړۍ له مهمو اړتیاوو څخه ده او د دې کورس له لارې به محصلین وکولای شي خپلې څېړنیزې او تحصیلي وړتیاوې لوړې کړي؛ او ویې ویل چې د ازموینې د پرچو تر کتنې وروسته به هر محصل د خپلي سویې مطابق صنف ته معرفي او د مسلکي استادانو تر لارښوونې لاندې به خپلې زده کړې پر مخ یوسي.
د یادونې وړ ده چې یاد معاونیت د محصلینو د ژبنیو او مسلکي مهارتونو د لوړاوي په موخه د ورته پروګرامونو د ترسره کولو لپاره د غزنه درخشان په نوم له یو خصوصي زده کړه ییز مرکز سره هم هوکړه لیک لاسلیک کړی ده.

د نشراتو او عامه اړیکو عمومي مدیریت
نېټه: شنبه
۱۴۴۷هـ.ق، شوال المکرم ۱۷ مه
۱۴۰۵هـ.ش، حمل ۱۵ مه
۲۰۲۶م، اپریل ۴ مه