غزني پوهنتون کې د ژبو او ادبیاتو پوهنځي مسؤلینو د پسرلني د درسونو د پیل سره سم د درسي بهیر د منظم والي په موخه له صنفونو څخه لیدنه ترسره کړه.
غزني پوهنتون کې د ژبو او ادبیاتو پوهنځی رئیس او د څانګو آمرینو د پسرلني سمیستر د درسي بهیر د پیل سره سم د یاد پوهنځي له بېلابېلو درسي صنفونو څخه د ستونزو د مخنیوي په موخه لیدنه ترسره کړه.
د دغې لیدنې پر مهال د یاد پوهنځی رئیس مفتی محمد میرویس عبدالله د استادانو د تدریسي بهیر، د محصلینو د حضور او ګډون او د صنفونو د عمومي وضعیت ارزونه وکړه. او د تدریس د لا ښه والي لپاره یې له استادانو او محصلینو سره خبرې اترې هم وکړې؛ او ټینګار یې وکړ، چې د درسي بهیر منظم ساتل، د تدریس کیفیت لوړول او د محصلینو علمي ظرفیت پیاوړی کول د پوهنځي له اساسي لومړیتوبونو څخه دي. د نوموړي په وینا، دا ډول لیدنې به په دوامداره توګه ترسره شي تر څو د تدریس بهیر په ښه ډول پر مخ ولاړ شي.
د یادونې وړ ده چې د ژبو او ادبیاتو پوهنځی تل هڅه کوي څو د کیفیت لرونکي تدریس او اغېزمن علمي چاپېریال د رامنځته کولو لپاره بېلابېل اقدامات ترسره کړي.
د نشراتو او عامه اړیکو عمومي مدیریت
نېټه: شنبه
۱۴۴۷هـ.ق، رمضان المبارک ١٨ مه
۱۴۰۴هـ.ش، حوت ١٦ مه
۲۰۲۶م، مارچ ٧ مه
