غزني پوهنتون کې د طب او عامه ادارې او پالیسۍ پوهنځیو د تشکیل د طرحې او د یادو کادري بستونو د اعلان د څرنګوالي په موخه د همغږۍ ناسته ترسره شوه.
غزني پوهنتون کې د علمي چارو د مرستیال مولوي محمد حیدر حمزه له لوري د پوهنځیو له رئیسانو او استادانو سره د طب او عامه ادارې او پالیسۍ پوهنځیو د تشکیل د طرحې او د یادو کادري بستونو د اعلان د څرنګوالي او همداراز د روانې ربعي د پاتي کارونو د څرنګوالي په موخه د همغږۍ ناسته ترسره شوه.
په دغه ناسته کې د پوهنتون د عمومي رئیس په شمول د پوهنځیو رئیسانو او استادانو ګډون کړی وو؛ چې پر مهال یې د طب او عامه ادارې او پالیسۍ پوهنځیو د علمي او اداري جوړښت، د کادري بستونو د معیاري اعلان پر اصولو هر اړخیز بحث وشو.
د یادې غونډې پر مهال عمومي رئیس شیخ مولوي عبدالمالک محسن وویل چې د دغو پوهنځیو فعاله کول د غزني پوهنتون د علمي پراختیا په لور یو مهم ګام دی او هڅه کېږي چې د کادري بستونو اعلان د لوړو زده کړو وزارت د نافذه قوانینو او علمي معیارونو سره سم ترسره شي، تر څو وړ او مسلکي کدرونه جذب شي.
ګډونوالو هم خپلې طرحې، وړاندیزونه او نظریات شریک کړل او ټینګار یې وکړ چې د یادو پوهنځیو د بریالي فعالیت لپاره باید کیفیت، تخصص او شفافیت ته ځانګړې پاملرنه وشي.
په پای کې پرېکړه وشوه چې د شریکو شوو نظریاتو پر بنسټ به د پوهنځیو د تشکیل نهایي طرحه او د کادري بستونو د اعلان لړۍ همغږې او منظمې شي، څو د غزني پوهنتون علمي بهیر لا پیاوړی او اغېزمن شي.
نېټه: یکشنبه
۱۴۴۷هـ.ق، د رجب المرجب ۲۷ ـمه
۱۴۰۴هـ.ش، د جدي ۲۷ مه
۲۰۲۶م، د جنوري ۱۸ مه
د نشراتو او عامه اړیکو عمومي مدیریت
