غزني پوهنتون کې د دیني او جهادي مدارسو د علماء کرامو او فاضلانو څخه د عالميې او عالیې دورو شپږ ورځنۍ ازموینه په پوره شفافیت او منظمه توګه پای ته ورسېده.
غزني پوهنتون کې د لوړو زده کړو وزارت اړوند تخصصاتو او دیني جامعاتو ریاست له لوري د یاد پوهنتون په کوربتوب؛ د ديني او جهادي مدارسو د علماء کرامو او فاضلانو څخه د عالمیه او عالیه دورو شپږ ورځنۍ ازموینه د بشپړ شفافیت، منظم پلان او ښو اداري تدابیرو په رڼا کې په بریالیتوب سره پای ته ورسېده.
یاده ازموینه چې د ټاکل شوي مهالوېش له مخې ترسره کېده، پکې د غزني ولایت د ټولو دیني مدارسو څخه ګڼ شمېر علماوو او فاضلانو ګډون کړی و. د ازموینې بهیر د اعلی نګران ( څارونکې) ټیم مدیره هیئت او د غزني پوهنتون د مسؤلینو تر جدي څار لاندې روان وو، څو د هر ډول بېنظمۍ، تبعیض او درغلیو مخه ونیول شي او ګډونوالو ته یو عادلانه او باوري چاپېریال برابر شي.
په ورته وخت کې د غزني پوهنتون مسؤلینو د ازموینو د تنظیم، امنیت، شفافیت او د ګډونوالو د اسانتیاوو په برخه کې هر اړخیز تدابیر نیولي وو، چې د علماوو لهخوا هم وستایل شول. ګډونوالو د شپږ ورځنۍ ازموینې له منظم بهیر، روښانه طرزالعمل او د ازموینې د ناظمینـو له سالم چلند څخه خوښي وښوده.
د یادونې وړ ده چې یادي شپږ ورځنۍ ازموینې ته شاو او خوا ۵۶۳ تنه علماء کرامو او فاضلانو نوم لیکنه کړې وه؛ چې له هغو څخه یې ۴۵۴ تنه علماء کرام او فاضلان په دغه شپږ ورځنۍ ازموینه کې حاضر وو.
د نشراتو او عامه اړیکو عمومي مدیریت
پنج شنبه ، ۱۱ رجب المرجب ۱۴۴۷ هـ.ق— ۱۱ جدې۱۴۰۴هـ ش
