غزني پوهنتون کې د دیني او جهادي مدارسو له علماوو او فاضلانو څخه د عالیې او عالمیې دورو شپږ ورځنۍ ازموینه په منظم او ټاکل شوي وخت پیل شوه.
غزني پوهنتون کې د دیني او جهادي مدارسو له علماوو او فاضلانو څخه د عالیې او عالمیې دورو شپږ ورځنۍ ازموینه د پوهنتون د رهبرۍ، مدیره هیئت او د لوړو زده کړو وزارت اړوند دیني جامعاتو او تخصصاتو ریاست څخه راغلي پلاوي تر څارنې لاندې په رسمي، منظم او ټاکل شوي وخت پیل شوه. دغه ازموینه د ترتیب شوي مهالوېش له مخې، د منظم پلان پر بنسټ ترسره کېږي، چې په ترڅ کې به یې د بېلابېلو دیني علومو له مضامینو څخه د علماوو او فاضلانو علمي سویې وارزول شي.
په ورته مهال د غزني پوهنتون مسؤلینو وویل، د ازموینې د روڼتیا او معیاري کېدو په موخه ټول لازم تدابیر نیول شوي او هڅه کېږي چې ازموینې په بشپړ نظم، شفافیت او عادلانه فضأ کې ترسره شي. همداراز د ازموینې لپاره د مدیره هیئت، نګرانانو ( د څارنې غړو) له لوري د ترتیب شویو پرچیو او سوالونو اړوند مکمل معلومات ورکړل. او له علماوو او فاضلانو څخه یې د ازموینې د اصولو، مقرراتو او نظم د مراعاتولو غوښتنه وکړه.
په همدې حال کې، د دیني او جهادي مدارسو علماوو او فاضلانو د ازموینو د مناسب چاپېریال له برابرېدو خوښي وښوده؛ او ویې ویل چې یادې ازموینې د دوی د علمي پرمختګ او رسمي ارزونې لپاره مهم ارزښت لري.
د نشراتو او عامه اړیکو عمومي مدیریت
شنبه ، ٦ رجب المرجب ۱۴۴۷ هـ.ق— ٦ جدې۱۴۰۴هـ ش
