د غزني پوهنتون د دعوت او ارشاد آمریت له لوري استادانو ته د حضرت محمدﷺ د سنتو اهمیت او ارزښت اړوند اصلاحی سیمینار وړاندې شو.
۱۴۴۶هـ ق د رجب المرجب ٢٧مه
۱۴۰۳هـ ش د سلواغې ٩مه
۲۰۲۵م د جنورۍ ٢٨مه
د غزني پوهنتون د دعوت او ارشاد آمریت په نوښت د اصلاحی سیمینارونو په لړ کې د "حضرت محمد ﷺ د سنتو اهمیت او ارزښت" تر عنوان لاندې مهم علمي او معلوماتي سیمینار ترسره شو. دغه سیمینار د شرعیاتو پوهنځي استاد مولوی مولاداد له لوري وړاندې شو.
سیمینار د پوهنتون په مسجد کې د علمي او دیني شخصیتونو، استادانو، په ګډون ترسره شو. په دغه علمي ناسته کې د اسلامي شریعت د یو اساسي اصل په توګه د سنتو پر اهمیت، د ژوند په بېلابېلو برخو کې د هغې د تطبیق اړتیا، او د معاصرې ټولنې لپاره د نبوي لارښوونو د ارزښت په اړه هر اړخیز بحث وشو.
ښاغلي مولاداد صاحب د سیمینار پر مهال د سنتو د رول په اړه روښانه دلایل وړاندې کړل او د اسلامي ټولنې لپاره د هغه د عملي کولو ګټې یې په تفصیل سره تشریح کړې. نوموړي یادونه وکړه چې د سنتو پیروي نه یوازې زموږ د اخلاقي او اجتماعي ژوند لپاره ضروري ده، بلکې دا زموږ د دیني هویت د ساتلو بنسټ هم دی.
د غونډې په پای کې ګډونوالو د دې ډول علمي او دیني سیمینارونو پر دوام ټینګار وکړ او د یاد آمریت له هڅو څخه یې مننه وکړه.
نشراتو او عامه اړیکو عمومي مدیریت
