غزني پوهنتون کې یو شمېر محصلینو ته د کتابتونونو د پېژندنې او مؤثرې مطالعې تر سرلیک لاندې یو ورځنی علمي او معلوماتي سمینار ترسره شو.
غزني پوهنتون کې د محصلانو چارو معاونیت او کتابتون مدیریت له لوري، د علمي او فرهنګي فعالیتونو په لړ کې، یو شمېر محصلینو ته د «کتابتونونو پېژندنې او مؤثرې مطالعې» تر عنوان لاندې یو ورځنی علمي او معلوماتي سمینار ترسره شو.
دغه سمینار د کتابتون د مدیر اسدالله منصور له لوري وړاندې شو، چې پرمهال یې محصلینو ته د کتابتونونو پر پېژندنه، ارزښت، د علمي سرچینو د سمې ګټې اخیستنې او د غزني پوهنتون د کتابتون په اصولو او مقرراتو؛ او دارنګه د مطالعې د اغېزمنو لارو چارو، د وخت مدیریت او د مطالعې لپاره د غوره ځای ټاکلو په اړه هر اړخیز معلومات وړاندې کړل. او زیاته یې کړه چې کتابتونونه د علمي ودې او څېړنیزو فعالیتونو مهم بنسټونه دي او محصلین باید د خپلو علمي وړتیاوو د پیاوړتیا لپاره له شته امکاناتو څخه اغېزمنه ګټه پورته کړي.
په ورته مهال د محصلانو چارو مرستیال مفتي عزت الله نوري، هم د کتابتون او مطالعې په ارزښت او اهمیت خبري وکړې او له محصلینو څخه یې غوښتنه وکړه؛ چې باید د خپلو درسونو سره سره کتابتون ته مراجعه وکړي او له ګټورو کتابونو څخه ګټه واخلي او محصلینو ته یې ډاډ ورکړ چې هره ستونزه او غوښتنه ولري، نو د محصلانو چارو معاونیت ته دي په هر وخت کې مراجعه وکړي ترڅو یې ستونزي د امکاناتو په شتون کې ورته حل کړي.
د یادونې وړ ده چې د دغه ډول علمي او معلوماتي پروګرامونو موخه د محصلینو د علمي ظرفیت لوړول، د مطالعې فرهنګ ته وده ورکول او د کتابتونونو د اغېزمنې استفادې زمینه برابرول دي.
د نشراتو او عامه اړیکو عمومي مدیریت
ورځ او نېټه: شنبه
۴/۰۱/۱۴۴۸ه ق
۳۰/۰۳/۱۴۰۵ه ش
۲۰/۰۶/۲۰۲۶م
