غزني پوهنتون کې استادانو ته په ساینسي علومو کې د څېړنې د میتودونو ترعنوان لاندې یو ورځنی علمي او معلوماتي سمینار ترسره شو.
قمري نېټه: صفرالمظفر، ۱۸، ۱۴۴۶ هـ.ق
لمريز نېټه: اسد، ۲۱ ، ۱۴۰۴ هـ.ش
مېلادي نېټه: اګست، ۱۲ ، ۲۰۲۵م
غزني پوهنتون کې د څېړنو او علمي مجلې معاونیت او د استادانو د مسلکي انکشاف آمریت په ګډه همکاري استادانو د مسلکي وړتیاوو د پیاوړتیا په موخه، په "ساینسي علومو کې د څېړنې میتودونه" تر عنوان لاندې یو ورځنی علمي او معلوماتي سمینار ترسره شو.
دغه سمینار د پوهنتون د څېړنو او علمي مجلې د مرستیال پوهندوی احسان الله کامران په پرانیستونکې وینا پیل شو چې پکې د څېړنې ارزښت او د پوهنتوني پرمختګ لپاره د هغې اغېز ته اشاره وکړه. نوموړي ټینګار وکړ چې معیاري څېړنه نه یوازې د علمي مقالو د تولید بنسټ دی، بلکې د ټولنې د ستونزو د حل لپاره هم مهم رول لري.
د سمینار اصلي برخه د ساینسي څېړنو یو شمېر مهمو ټکو ته ځانګړې وه چې د ښوونې او روزنې پوهنځي استاد دوکتور احمد علي مهراد له لوري د څېړنې د ډولونو، د څېړنیزو پوښتنو د جوړښت، د معلوماتو د راټولولو او تحلیل، او د علمي لیکنې د اصولو په اړه تفصیلي معلومات وړاندې شول. همدارنګه، ګډونوالو ته د نړیوالو اکاډمیکو معیارونو او د سرچینو د سمې کارونې په اړه عملي لارښوونې ورکړل شوې.
د بحث او پوښتنو په برخه کې، استادانو خپلې نظریې، تجربې او ستونزې شریکې کړې چې د هغوی پوښتنو ته مسلکي ځوابونه ورکړل شول. ګډونوالو د دا ډول پروګرامونو د دوام غوښتنه وکړه او څرګنده یې کړه چې دا ډول علمي ناستې د پوهنتون د علمي فضا د ودې او د څېړنیز کیفیت د لوړوالي لپاره اړینې دي.
په پای کې، ښاغلي کامران په سمینار کې له ګډون کوونکو استادانو مننه وکړه او ژمنه یې وکړه چې د استادانو د څېړنیزو ظرفیتونو د پیاوړتیا لپاره به ورته علمي پروګرامونه په منظم ډول ترسره کېږي.
د نشراتو او عامه اړیکو عمومي مدیریت
