د غزني پوهنتون محصلینو ته د ځنګلونو، اوبو او هوا د نړیوالې ورځې په مناسبت علمي او معلوماتي سیمینار وړاندې شو.
قمري: ۲۴ رمضان المبارک ۱۴۴۶
لمریز: ۴ (حمل) ۱۴۰۴
میلادي: ۲۴ مارچ ۲۰۲۵
د غزني پوهنتون محصلینو ته د ځنګلونو، اوبو او هوا د نړیوالې ورځې په مناسبت علمي او معلوماتي سیمینار وړاندې شو. یاد سیمینار د محصلانو چارو د معاونیت په نوښت، د ځنګلونو، اوبو او هوا د نړیوالې ورځې په مناسبت تنظیم شوی وو. په دې علمي سیمینار کې د پوهنتون استادانو، محصلینو ګډون کړی و.
د سیمینار پیل د قران کریم په مبارکو آیتونو سره وشو. ورپسې د غزني پوهنتون د محصلانو چارو مرستیال محترم انجنیر محمد عثمان منیب پرانیستونکې وینا وکړه، چې پکې یې د طبیعي منابعو ارزښت ته اشاره وکړه او ویې ویل:ځنګلونه د ژوند شریانونه دي، پاکې اوبه د بقا اساس جوړوي، او پاکه هوا زموږ د سالم ژوند ضمانت کوي. د دې دریو مهمو عناصرو ساتنه زموږ اخلاقي او ملي دنده ده.
ور پسې د څېړنو او علمي مجلې معاونیت مرستیال ښاغلي پوهندوي احساالله کامران د ځنګلونو،اوبو او هوا اړوند جوړ کړی پریزنټیشن وړاندې کړ، چې پکې یې د ځنګلونو د له منځه تلو، د اوبو د ککړتیا او د هوا د کثافاتو پر علتونو او پایلو هر اړخیز بحث وکړ. نوموړي وویل، چې افغانستان په وروستیو کلونو کې له جدي چاپېریالي ستونزو سره مخ دی، او اړتیا ده چې ځوان نسل د دې ستونزو د حل لپاره عملي ګامونه پورته کړي.
او ځنګلونو د بیا زرغونولو، د اوبو د مدیریت، او د هوا د پاک ساتلو په اړه مفصل معلومات وړاندې کړل. ګډونوالو ته د عملي حل لارو په اړه ځانګړي وړاندیزونه شریک شول، چې پکې د نیالګیو کینول، د اوبو د سپما میتودونه، او د هوا د ککړتیا مخنیوي لارې شاملې وې.
په پای کې، د سیمینار ګډونوالو خپلې پوښتنې او نظریات وړاندې کړل، او ټینګار وشو، چې د پوهنتون محصلین باید د چاپېریالي ساتنې سفیران شي.
د سیمینار ګډونوالو ژمنه وکړه، چې د خپلو ټولنو په کچه به د چاپېریال ساتنې لپاره عملي اقدامات ترسره کوي، ترڅو راتلونکي نسلونه له پاکې او صحتمندې طبیعي فضا برخمن وي.
د نشراتو او عامه اړیکو عمومي مدیریت
