د غزني پوهنتون د عمومي رئیس الحاج مولوي عبدالواسع منصور په مشرۍ د رهبرۍ شورا ناسته ترسره شوه.
نېټه او ورځ:
یکشنبه، ۲۰ جمادیالثاني ۱۴۴۶ هـ ق
۲ جدی ۱۴۰۳ هـ ش
۲۲ دسمبر ۲۰۲۴ م
د غزني پوهنتون د رهبرۍ شورا ناسته د عمومي رئیس الحاج مولوي عبدالواسع منصور په مشرۍ او د ټولو غړو په ګډون ترسره شوه. غونډه د قران کریم د مبارکو آیاتو په تلاوت سره پیل او په یوشمېر مهمو موضوعاتو پکې د بحث او خبرو اترو تر څنګ لازمي پریکړي وشوې.
د رهبري شورا د پریکړي په اساس باید د پوهنتون ټولو پوهنځيو لپاره د صحي کېټونو او په دغه برخه کې د صحي مشاور په اړوند د صحت عامې ریاست له مسؤلینو سره په همغږۍ یاده چاره ترسره او دغه ستونزه له منځه یوسي.
همدارنګه، په پوهنتون کې د سرسبزۍ او ورزشي ساحو د جوړښت او پاتي کارونو د بشپړتیا په اړه د بحث ترڅنګ، پرېکړه وشوه چې د سرسبزۍ لپاره عملي اقدامات وشي او ورزشي ساحې په جدي توګه پراخې شي. د دې موخې لپاره اړینې سرچینې او هڅې په کار واچول شي تر څو دغه کارونه لاښه مخته ولاړ شي.
او د پوهنتون د درسي چاپیریال د لا منظمتیا او د استادانو لپاره د نورو اسانتیاوو د راوستو اړوند، پرېکړه وشوه چې یو ځانګړی هیئت دې د استادانو ستونزې له نږدې وڅېړي او د هغوی اړتیاوو ته په لنډ وخت کې رسیدګي وکړي.
او د پوهنځیو د کمیټو او نورو فعالیتونو د ترسره کولو اسناد او شواهد دي د اړوندو پوهنځیو له رئیس صاحبانو سره په خپل وخت شریک شي، ترڅو د پوهنتون کړنې په شفاف ډول مدیریت شي.
غونډې په پای کې د پوهنتون اړوند ځینې نورې موضوعګانې هم وڅېړل شوې او په اړوند یې لازمي پرېکړې ترسره شوې.
غونډه د دعا په ویلو سره پای ته ورسېده.
د نشراتو او عامه اړیکو عمومي مدیریت
