غزني پوهنتون کې مسؤلینو او استادانو ته د تحصیلي نصابونو د ارزونې، تدوین، بیاکتنې او پراختیا درې ورځنی علمي سمینار پیل شو.
د لوړو زده کړو وزارت د تحصیلي نصاب رئیس مفتي عبدالرؤف فراهي په مشرۍ د شرعي، مسلکي او علمي متخصصینو پلاوي، د نصاب د ارزولو په موخه غزني پوهنتون ته له سفر سره سم؛ د دغه پوهنتون د ټولو پوهنځیو اړوند برنامو، تحصیلي نصابونو تر ارزونې وروسته نن ورځ د یاد پوهنتون رهبرۍ او استادانو ته د کاربازار، د نننۍ ټولنې له اړتیاوو او غوښتنو، شرعي اصولو او د نظام له پالیسۍ سره سم د تحصیلي نصابونو نوي کولو اړوند درې ورځنی علمي او روزنیز سمینار پیل کړ.
د سمینار د پیل پرمهال د غزني عمومي رئیس شیخ مولوي عبدالمالک محسن وویل چې په پوهنتونونو او علمي ادارو کې نصاب یوه مهمه برخه ده که چیري دغي برخي ته توجه او پاملرنه ونشي دغه ادارې پرمختګ نشي کولای نو د محترم وزارت دغي برخي ته ډیر متوجه او غواړي چې د پوهنتونونو نصابونه د کاربازار، د ټولنې د غوښتنو، شرعي اصولو او د نظام د پالیسۍ سره سم ترتیب کړي.
وروسته د تحصیلي نصاب رئیس مفتي عبدالرؤف فراهي وویل، چې د تحصیلي نصابونو بیاکتنه او د وخت د غوښتنو مطابق جوړولو په اړه عالیقدر امیرالمؤمنین حفظه الله ورعاه ټینګار لري او دا د افغانستان پرمختګ لپاره مهمه موضوع ده. هغه زیاته کړه، چې د نصابونو ارزول خورا اړینه چاره ده، ځکه چې د یو ملک ټولې مهمې برخې، لکه فکر او عقیده، سیاسي او اقتصادي قوت، صحت، کرنه، صنعت، د کانونو مسلکي استخراج او د یو نظام هراړخیز استحکام ورپورې تړلي دي.
د نشراتو او عامه اړیکو عمومي مدیریت
شنبه
۱۴۴۸/۰۴/۱۳ هـ.ق
۱۴۰۵/۰۷/۴ هـ.ش
۲۰۲۶/۰۹/۲۶م
