د غزني پوهنتون د ماسټر پلان او تفصیلي پلان د چټک بشپړېدو په موخه د کور او ښار جوړولو ریاست له مسؤلینو سره ګډه ناسته ترسره شوه.
د غزني پوهنتون د فزیکي پرمختګ او معیاري ودانیزو چارو د تنظیم او تسریع په موخه، د دغه پوهنتون د مالي او اداري چارو مرستیال شیخ الحدیث مولوي عبدالهادي ذولهادي د کور او ښار جوړولو ریاست له رئیس او ورسره مل تخنیکي ټیم سره ګډه ناسته ترسره کړه.
په ناسته کې د دواړو لورو تر منځ د یاد پوهنتون د ماسټر پلان او تفصیلي پلان د جوړونې بهیر، پرمختګ او پاتې مرحلو په اړه هر اړخیز بحث وشو.
د غونډې پر مهال شیخ صاحب ټینګار وکړ چې د ماسټر پلان بشپړول د پوهنتون د راتلونکي فزیکي پراختیا، معیاري ودانیو، شنو ساحو، او د محصلینو د مناسب چاپېریال لپاره حیاتي اهمیت لري. همدارنګه، د کور او ښار جوړولو ریاست استازو ډاډ ورکړ چې تخنیکي ټیم به د پلان جوړونې چارې په چټکۍ سره پرمخ وړي او د کیفیت د ساتنې ترڅنګ به د وخت د سپما هڅه هم کوي.
د دواړو اړخونو ترمنځ هوکړه وشوه چې د ګډو تخنیکي غونډو لړۍ به دوام ومومي، څو د پلان جوړونې ټول تخنیکي او عملي جزئیات په بشپړ همغږۍ سره پای ته ورسېږي.
یادونه باید وشي چې د غزني پوهنتون د ماسټر پلان بشپړېدل به نه یوازې د پوهنتون د بنسټیزو ودانیو د منظم پرمختګ لپاره لار هواره کړي، بلکې د ښار د ښاري نظم او پرمختیایي همغږۍ په برخه کې هم مثبته ونډه ولري.
د نشراتو او عامه اړیکو عمومي مدیریت
چهارشنبه، ۱۵، ربیع الثاني،۱۴۴۷هـ.ق — ۱۶، مېزان، ۱۴۰۴ هـ.ش
