غزني پوهنتون کې محصلینو ته د تشبث، کاري فرصتونو ایجاد او اقتصادي پرمختګ تر عنوان لاندې یو ورځنی علمي او مسلکي سمینار ترسره شو.
غزني پوهنتون کې د علمې څېړنو او معاونیت په نوښت او د AELSO مؤسیسې له لوري محصلینو ته د “تشبث، کاري فرصتونو ایجاد او اقتصادي پرمختګ” تر عنوان لاندې یو ورځنی علمي او مسلکي سمینار ترسره شو.
په دغه سمنیار کې د غزني پوهنتون د رهبري، استادانو او محصلینو ترڅنګ د اقتصاد ریاست او خصوصي پوهنتونونو استازو ګډون کړی و.
سمینار د قرآن کریم د مبارکو آیتونو په تلاوت سره پیل شو.
ورپسې عمومي رئیس شیخ مولوي عبدالمالک محسن د AELSO مؤسسې استازو او ټولو ګډونوالو ته د ښه راغلاست ترڅنګ د دغه علمي او اقتصادي سمینار پر اهمیت خبرې وکړې. او ویې ویل چې موږ او تاسو ټول باید د دغه اسلامي نظام او شته امنیت شکرانه ادا کړو او باید د افغانستان هر وګړی له ستونزو، احتیاجاتو څخه خلاص؛ او ضرورتونه یې ورته پوره کړو.او زیاته یې کړه چې د کاري فرصتونو په ایجاد سره د هیواد خپلواکې ساتل کیږي نو باید دغه برخي ته زیاته توجه وکړو څو مو خلک له احتیاجه خلاص شي.
دارنګه د AELSO مؤسیسې رئیس محمد حنیف فرزان د خپلې وینا پر مهال وویل چې په اوسنیو شرایطو کې د تشبث، نوښت، کوچنیو کاروبارونو پراختیا او د ځوانانو اقتصادي پیاوړتیا د ټولنې له مهمو اړتیاوو څخه شمېرل کېږي. او همداراز يې د اقتصادي ودې، کاري فرصتونو رامنځته کولو، د ځوانانو د مهارتونو لوړولو، پانګونې، بازارموندنې او د تشبثي فکر د ودې په اړه هر اړخیز معلومات وړاندې کړل.
وروسته د یادې مؤسیسې د برنامو مسؤل عبدالقهار بهیشتي او د غزني پوهنتون د اقتصاد پوهنځي استاد پوهندوی احسان الله سعید د تشبث، کاري فرصتونو په ایجاد او بیکاري په له منځه وړلو او د افغانستان پر اقتصادي وضعیت، د ځوانانو پر وړاندې د موجودو ننګونو او د حل عملي لارو چارو په تړاو چمتو کړي پریزینټېشونونه وړاندې کړ؛ او د ګډونوالو پوښتنو ته یې ځوابونه ورکړل.
همداراز ګډونوالو دغه سمینار ګټور وباله او ویې ویل چې دا ډول علمي او مسلکي پروګرامونه د ځوانانو د فکري ودې، اقتصادي ځان بسیاینې او کاري فرصتونو د رامنځته کېدو لپاره اغېزناک رول لري.
د سمینار په پای کې د علمي څېړنو او مجلې مرستیال پوهندوی دوکتور دریاخان هڅاند د AELSO مؤسیسې له مسؤلینو څخه مننه وکړه او د سیمنار جمع بندي پرمهال يې، محصلین وهڅول چې باید نوښتونه او اختراعات وکړي څو له احتیاجي خلاص او پر خپل ځان بسیا شي.
د نشراتو او عامه اړیکو عمومي مدیریت
نېټه: سه شنبه
۱۴۴۷هـ.ق، ذوالحجة الحرام ۲ مه
۱۴۰۵هـ.ش، ثور ۲۹ مه
۲۰۲۶م، مې ۱۹ مه
