غزني پوهنتون او د یاد ولایت د چاپېریال ساتنې ریاست سره د ګډو علمي همکاریو د تړون په اساس ( د نیالګي په کېنولو سره چاپېریال وژغورئ) تر سرلیک لاندې د نیالګیو کېنولو کمپاین ترسره شو.
ورځ: دوشنبه
نیټه: ١٠ رمضان المبارک ۱۴۴۶ هـ.ق
٢٠ کب ۱۴۰۳ هـ.ش
١٠ مارچ ۲۰۲۵ م
نن غزني پوهنتون او د دغه ولایت د چاپېریال ساتنې ریاست د ګډو علمي همکاریو د تړون په اساس د د نیالګیو په کینولو سره چاپیریال وژغورئ تر عنوان لاندې، د نیالګیو کېنولو کمپاین ترسره کړ.
یاد مراسم د پوهنتون د غونډو په تالار کې ترسره شول، چې پکې د غزني ولایت محترم والي صاحب، د چاپیریال ساتنې ریاست رئیس او استازو، د غزني پوهنتون عمومي رئیس صاحب او د دې پوهنتون، استادانو،اداري کارکوونکو او محصلینو پکي ګډون کړی وو.
غونډه د قران کریم په مبارکو آیتونو په تلاوت سره پیل شوه،ورپسې د غزنی پوهنتون عمومی رئیس الحاج مولوي عبدالواسع منصور ګډونوالو ته د ښه راغلاست ترڅنګ د چاپېریال ساتنې ملي ادارې له استازو مننه وکړه چې د پاک چاپېریال د رامنځته کولو لپاره هڅې کوي.
ښاغلي منصور د نیالګیو کېنولو ارزښت ته اشاره وکړه، او ویې ویل چې ونې نه یوازې د انساني ټولنې، بلکې د ټولو ژونديو موجوداتو لپاره حیاتي اهمیت لري. همداراز، د اسلامي لارښوونو له مخې د نیالګیو کېنول یو ستر اجر لري.
او زیاته یې کړه،په دې کمپاین کې د پوهنتون د شته شنو سیمو پراخولو ته ځانګړې پاملرنه وشوه، او ګډونوالو ته د نیالګیو د سمې ساتنې او پالنې په اړه هر اړخیز معلومات ورکړل شول.
ښاغلی منصور ټینګار وکړ چې د پوهنتون ټول استادان، محصلین او کارکوونکي باید د پوهنتون د ښکلا او زرغونتیا لپاره لاس په کار شي، ترڅو دا علمي بنسټ د نورو لپاره یوه نمونه وګرځي.
ورپسې د نیالګیو د کېنولو د کمپاین په اړه، د چاپېریال ساتنې ریاست رئیس محترم مولوي عبدالرحمن عرفان وویل
زه د پوهنتون له محترمې رهبرۍ مننه کوم چې د دې مهم کمپاین په ترسره کولو کې یې همکاري وکړه. الله تعالی دې زموږ دا هڅې قبولې کړي او زموږ ټولنه دې د زرغون او پاک چاپېریال څخه برخمنه کړي.
زموږ موخه دا ده چې خپل چاپېریال وساتو، ځکه چې دا زموږ دیني، اخلاقي او ټولنیز مسؤولیت دی. دا ورځ یوازې د نیالګیو کېنولو لپاره نه ده، بلکې زموږ هدف دا دی چې عام ولس ته د چاپېریال ساتنې ارزښت ورسول شي او هغوی تشویق کړو ترڅو نیالګي کېنوي او د زرغون چاپېریال په جوړولو کې ونډه واخلي.
د دې ډول ناستو بله مهمه موخه دا ده چې محصلین د چاپېریال ساتنې پیغام نورو ته ورسوي، ځکه چې د ټولنې راتلونکی د علمي قشر په لاس کې دی. اسلامي امارت هر کال د دې ډول غونډو او کمپاینونو له لارې عامه پوهاوی زیاتوي، ترڅو خلک د چاپېریال د ساتنې په اړه عملي ګامونه واخلي.
د راتلونکي کال لپاره، موږ پلان لرو چې په غزني ولایت کې ۱۲ لکه (۱.۲ میلیون) نیالګي کېنوو، چې دا به د سیمې د زرغونتیا او چاپېریالي توازن لپاره یو مهم ګام وي.
په اخیر کې د یاد پوهنتون د کرنې پوهنځی استاد پوهندوي احسان الله کامران د نیالګې په کینولو سره چاپیریال وژغورئ تر عنوان لاندې ترتیب کړی پریزینټېشن ارآیه کړو.
د مراسمو په پای کې، ګډونوالو په ګډه نیالګي کېنول، او ژمنه یې وکړه چې د زرغون چاپېریال د رامنځته کولو لپاره به خپلې هڅې جاري ساتي.
د غزني پوهنتون مشرتابه دا ډول برنامې د پوهنتون د پرمختګ او چاپېریال ساتنې لپاره مهمې بولي او د ټولو ښکېلو اړخونو له همکاریو څخه مننه کوي.
نشراتو او عامه اړیکو عمومي مدیریت
