غزني پوهنتون کې کرنې پوهنځي د خپلو علمي او څېړنیزو فعالیتونو د لا پیاوړتیا او هڅونې په موخه، څلور تنه غوره څېړونکي استادان او څلور تنه غوره مونوګراف لیکونکي محصلین د ځانګړو مراسمو په ترڅ کې وستایل.
غزني پوهنتون کې د کرنې پوهنځي له لوري د تیر ۱۴۰۴ هـ.ش کال، څلور تنه غوره څېړونکي استادان او څلور تنه غوره مونوګراف لیکونکي محصلین د علمي او څېړنیزو فعالیتونو د لا پیاوړتیا او هڅونې په موخه د ځانګړو مراسمو په ترڅ کې وستایل.
د یادو مراسمو پرمهال عمومي رئیس شیخ مولوي عبدالمالک محسن د علمي څېړنو ارزښت، د استادانو او محصلینو د علمي هڅو رول او د کرنې په برخه کې د نوښتګرو او عملي څېړنو پر اړتیا خبرې وکړې؛ او زیاته یې کړه چې د غوره څېړونکو او مونوګراف لیکونکو ستاینه د علمي استعدادونو د هڅونې، د څېړنې د فرهنګ د پیاوړتیا او د کیفیت لرونکو علمي فعالیتونو د پراختیا لپاره اغېزمن ګام دی.
دارنګه د کرنې پوهنځي رئیس پوهنمل ثابت احمد باوري د یاد پوهنځي له لوري د ترسره شویو څېړنيزو چارو په اړه هر اړخیز معلومات وړاندې کړل.
او همداراز يې د ۱۴۰۴ هـ.ش کال څلور غوره څېړونکي استادان او څلور غوره مونوګراف لیکونکي محصلین د خپلو علمي هڅو او لاسته راوړنو له امله د تقدیرنامو په ورکولو سره یې د هغوی هڅې وستایلې.
د یادونې وړ ده چې غزني پوهنتون د علمي څېړنو، نوښتونو او د محصلینو د علمي استعدادونو د ودې په برخه کې د لا ډېرو هڅو د ملاتړ او هڅونې په موخه خپلو فعالیتونو ته دوام ورکوي.
د نشراتو او عامه اړیکو عمومي مدیریت
سه شنبه
۱۴۴۸/۰۳/۰۴ هـ.ق
۱۴۰۵/۰۵/۲۷ هـ.ش
۲۰۲۶/۰۸/۱۸م
