غزني پوهنتون کې د محصلینو مسلکي وړتیاؤ لوړولو او د کارموندنې بازار ته د هغوی چمتو کولو په موخه د “سي وي لیکنې او بریالۍ مصاحبې” تر سرلیک لاندې روزنیز سمینار ترسره شو.
غزني پوهنتون کې د محصلانو چارو معاونیت له لوري د ټولو پوهنځیو د څلورمو ټولګیو محصلینو د مسلکي وړتیاؤ لوړولو او د کارموندنې بازار ته د هغوی چمتو کولو په موخه د سي وي لیکنې او بریالۍ مصاحبې تر سرلیک لاندې یو ورځنی روزنیز سمینار ترسره شو.
د سمینار پیل د قرآن پاک په مبارکو آیتونو سره وشو. وروسته یاد سمینار د ژبو او ادبیاتو پوهنځي استاد پوهنیار عبدالحسین نظري له لوري وړاندې شو، چې پر مهال یې د معیاري سي وي لیکلنې، د دندې لپاره د غوښتنلیک ترتیب، د کاري مصاحبې مهمو اصولو، په ځان باور پیاوړتیا او د بریالۍ مرکې تخنیکونو په اړه هر اړخیز معلومات وړاندې کړل.
ګډونوالو محصلینو دغه روزنیز پروګرام ګټور وباله او ویې ویل، چې ورته سمینارونه د دوی د مسلکي ظرفیتونو په لوړولو او راتلونکو کاري فرصتونو ته د چمتووالي په برخه کې مهم رول لري.
غزني پوهنتون هڅه کوي ترڅو د نظري زده کړو ترڅنګ محصلین له عملي او مسلکي مهارتونو سره سم وروزي، څو د فراغت وروسته وکولای شي په ټولنه او کاري ډګر کې اغېزمن رول ولوبوي.
د نشراتو او عامه اړیکو عمومي مدیریت
نېټه: دوشنبه
۱۴۴۷هـ.ق، ذوالقعدة الحرام ۲۴ مه
۱۴۰۵هـ.ش، ثور ۲۱ مه
۲۰۲۶م، مې ۱۱ مه
