غزني ولایت مقام کې د همغږۍ ګمېتې د پرېکړې په اساس د ۱۴۰۵ هـ ش کال د نیالګیو کېنولو ملي کمپاین مراسم به په غزني پوهنتون کې ترسره شي.
نن ورځ په غزني ولایت مقام کې د همغږي کمېټې د ناستې په ترڅ کې د یاد ولایت د ټولو ریاستونو د مسؤلینو د ګډون ترڅنګ د غزني پوهنتون د مالي او اداري چارو مرستیال الحاج شیخ عبدالهادي ذوالهادي او د کرنې پوهنځي استاد پوهندوی محمد عمر دروېش هم ګډون کړی وو.
د ناستې پرمهال د مالي او اداري چارو مرستیال الحاج شیخ عبدالهادي ذوالهادي د سرسبزۍ په برخه کې د غزني پوهنتون اړتیاوې او ضرورتونه له مسؤلینو سره شریک کړل؛ او د اړوندو ریاستونو له مسؤلینو څخه وغوښتل، تر څو د غزني پوهنتون په کچه د نیالګیو کېنولو پروګرام کې هر اړخیزه همکاري وکړي او د شنو ساحو د پراختیا په برخه کې خپل مسؤلیتونه په جدي توګه ترسره کړي.
نوموړي په خپله وینا کې وویل د نیالګیو کېنول نه یوازې د سالم چاپېریال ساتنې لپاره مهم دی، بلکې د سالم تعلیمي چاپېریال په رامنځته کولو کې هم اغېزمن رول لري.
په ورته مهال د یادې کمېټې مسؤلینو له پوهنتون سره د چاپېریال د ښکلا او سرسبزۍ په برخه کې د هر ډول همکارۍ ډاډ څرګند کړ او د ناستې په ترڅ کې يې پریکړه وکړه چې د نیال اېښودنې ملي کمپاین به لومړی په غزني پوهنتون کې پیل شي.
د نشراتو او عامه اړیکو عمومي مدیریت
نېټه:سه شنبه
۱۴۴۷هـ.ق، رمضان المبارک ١٤ مه
۱۴۰۴هـ.ش، حوت ١٢ مه
۲۰۲۶م، مارچ ٣ مه
