د غزني پوهنتون د کیمیا او بیولوژي لابراتوارونو څخه د مسلم خصوصي پوهنتون د طب او ستوماتولوژي پوهنځیو دیرش تنه محصلینو د یو علمي سیر په ترڅ کې لیدنه وکړه.
قمري نېټه: ربیع الاول ،۲۱، ۱۴۴۷ هـ.ق
لمريز نېټه: سنبله، ۲۳ ، ۱۴۰۴ هـ.ش
مېلادي نېټه: سپتامبر، ۱۴ ، ۲۰۲۵م
نن ورځ غزني پوهنتون ته د مسلم خصوصي پوهنتون د طب او ستوماتولوژي پوهنځیو دېرش تنه محصلینو د عملي زده کړو په موخه علمي سیر ترسره کړ، چې په ترڅ کې یې د دغه پوهنتون د کیمیا او بیولوژي لابراتوارونو څخه د لیدنې ترڅنګ د تضمین کیفیت آمریت له لوري ورته د لابراتوارونو پېژندنې اړوند معلوماتي سمینار هم وړاندې شو.
یاد علمي سفر چې د مسلم پوهنتون د علمي چارو مرستیال، محصلانو چارو مرستیال، د طب پوهنځي استادانو او محصلینو پکې شتون درلود، د دواړو پوهنتونونو د دوه اړخیزو ګډو علمي همکاریو د تړون په اساس ترسره شو. په پیل کې د غزني پوهنتون د مسؤلینو له لوري ورته ښه راغلاست او هرکلی وویل شو، وروسته د تضمین کیفیت آمر پوهندوی دوکتور دریاخان هڅاند له لوري ورته د لابراتوارونو د پېژندنې اړوند معلوماتي سمینار وړاندې شو.
وروسته د لابراتوارونو مسوولینو د ملسم پوهنتون محصلینو ته د لابراتوارونو په جوړښت، د وسایلو په ډولونو او د هغوی د کارونې په اړه مفصل معلومات وړاندې کړل. همدارنګه د هغوی پوښتنو ته ځوابونه وویل شول او ورته د عملي څېړنو په څرنګوالي کې عملي لارښوونې ورکړل شوې.
د مسلم خصوصي پوهنتون محصلینو دغه لیدنه ډېره ګټوره وبلله او څرګنده یې کړه چې د دې ډول علمي سفرونو په ترڅ کې به دوی کولای شي د عملي تجربو له لارې خپله علمي پوهه نوره هم پیاوړې کړي.
د غزني پوهنتون مسوولینو ژمنه وکړه چې د راتلونکي لپاره به هم د علمي او مسلکي همکارۍ په برخه کې ورته فرصتونه برابر کړي، څو محصلین د معیاري زده کړو ترڅنګ له عملي تجربو څخه هم برخمن شي.
د نشراتو او عامه اړیکو عمومي مدیریت
