د غزني پوهنتون د تحقیقاتو او علمي څېړنو معاونیت له لوري د یاد پوهنتون استادانو ته د تحقیقي اخلاقو او څېړنیزو اطلاعاتو د راټولولو لاري چاري تر عنوان لاندي دوه ورځنی سمینار دائر شو.
دوشنبه: ۱۱/ربیع الثاني/۱۴۴۶ه.ق
۲۳/مېزان/۱۴۰۳ه.ش
۱۴/اکټوبر/۲۰۲۴م
د غزني پوهنتون د تحقیقاتو او علمي څېړنو معاونیت له لوري د دغه پوهنتون استادانو ته د تحقیقي اخلاقو او د څېړنیزو اطلاعاتو د راټولولو لاري چاري تر سرلیک لاندي دوه ورځنی علمي سمینار دائر شو، د سمینار د پیل پرمهال د یاد پوهنتون عمومي رئیس الحاج مولوي عبدالواسع منصور د داسي سمینارونو دائرول ګټور وبلل او ویې ویل چې علمي سمینارونه د پوهي د کچي د لوړوالي، په پوهنتون کې د استادانو د همغږۍ او یووالي او همدارنګه یو له بل سره د علمي معلوماتو د شریکولو سبب کیږي ښاغلي منصور په خپلو خبرو کې زیاته کړه چې استادان باید د علمي څېړنو د ترسره کولو ترڅنګ باید د محصلینو درسونو او د هغوي د بې ځایه وخت تیرولو مخنیوي ته زیاته توجه وکړي او خپل مسؤلیت په خپل وخت ادا کړي.
ورپسې د تعلیم او تربیې پوهنځي د تاریخ څانګي استاد پوهنیار سید رحمت الله موسوي د تحقیق په روشونو، د علمي تحقیقاتو په سرقت او د علمي تحقیقاتو د سرقت په ډولونو او همدارنګه د څېړنو په اخلاقي کودونو، د څېړنو د سرته رسولو په برخه کې د فورم او د مقاله لیکونکي لپاره د مقاله لیکني شرطونو اړوند چمتو کړي معلومات وړاندي کړل. او د سمینار په دوهمه برخه کې د زراعت پوهنځي استاد پوهنمل روح الله کمال د څيړني په اخلاقو، څېړنیزو سرغړونو او همدارنګه په نړیوالو ژورنالونو کې د مقالاتو په عادلانه کره کتنه او د مقاله کره کتونکو په دندو، قوانینو او د څېړنو د مالي موضوعاتو اړوند معلومات وړاندي کړل او په پای کې د ګډون کوونکو پوښتنو ته ځوابونه وویل شول.
د نشراتو او عامه اړیکو عمومي مدیریت
