د غزني پوهنتون خپله اتمه ګڼه علمي او څېړنیزه مجله تر بشپړیدو وروسته چاپ او نشر ته وسپارله.

د غزني پوهنتون علمي او څېړنیزه مجله چې د هېواد د لوړو زده کړو د بنسټونو له مهمو علمي خپرونو څخه ده، خپله اتمه ګڼه یې تر بشپړیدو وروسته د چاپ او نشر لپاره وسپارله.
دغه علمي مجله د غزني پوهنتون د علمي بورډ تر مستقیمې څارنې لاندې چمتو شوې چې پکې د بېلابېلو پوهنځیو استادانو او څېړونکو علمي، څېړنیزې او تحلیلي لیکنې راټولې شوې دي. د مجلې دا ګڼه د طبیعي علومو، ټولنیزو علومو، ژبپوهنې، تعلیم او روزنې، او د اسلامي مطالعاتو په برخو کې نوې څېړنې او علمي مقالې رانغاړي.
د غزني پوهنتون د علمي څېړنو او مجلې معاونیت مرستیال پوهنمل عبدالمتین میاڼي د مجلې د اتمې ګڼې د بشپړیدو په مناسبت وویل:
دا د پوهنتون د علمي ظرفیت د پیاوړتیا، د څېړنیزې روحیې د هڅونې، او د علمي نوښت د ترویج یو بل مهم ګام دی. موږ ویاړو چې زموږ پوهنتون د علمي خپرونو له لارې د ملي او نړیوالو علمي بحثونو برخه ګرځي. او زیاته یې کړه چې د اتمې ګڼې د چمتو کولو په بهیر کې د علمي معیارونو، د څېړنو د اعتبار ټول اصول په بشپړ ډول مراعات شوي دي، څو د لوړو علمي معیارونو لرونکې مجله لوستونکو ته وړاندې شي.
د غزني پوهنتون علمي او څېړنیزه مجله هر کال دوه ځله خپریږي چې موخه یې د علمي مقالو، څېړنو او فکري نظریاتو د خپرولو له لارې د پوهنتوني څېړنو د ودې او د علمي تبادلې د فرهنګ پیاوړتیا ده.
د پوهنتون مسؤلینو وویل چې د مجلې چاپ شوې نسخه به ژر د استادانو، اداري کارکوونکو او د علمي څېړنو له لېواله کسانو سره شریکه شي، او برېښنايي بڼه یې د پوهنتون رسمي وېب‌پاڼې او ټولنیزو رسنیو  لارې د عامو لوستونکو لاسرسي ته وړاندې شوه.

د نشراتو او عامه اړیکو عمومي مدیریت
پنج شنبه، ۲۳، ربیع الثاني،۱۴۴۷هـ.ق — ۲۴، مېزان، ۱۴۰۴ هـ.ش