غزني پوهنتون کې د مالې او اداري چارو مرستیال د پوهنځیو له رئیسانو سره په چارو کې د مشورې، اداري بهیر د چټکتیا او همغږۍ اړوند ناسته ترسره کړه.

غزني پوهنتون کې د مالي او اداري چارو مرستیال شیخ الحدیث مولوي عبدالهادي ذولهادي د پوهنتون د اداري، مالي او تدریسي چارو د لا ښې همغږۍ، د کارونو د شفافیت، او اداري بهیر د چټکتیا په موخه د همغږۍ ناسته ترسره کړه.
د غونډې په پیل کې شیخ صاحب د ګډونوالو هرکلی وکړ او د مسؤلیت، په کارونو کې د شفافیت، د بیت المال د ساتنې او په کارونو کې د مشورې اړوند یې خبري وکړې؛ نوموړي زیاته کړه چې د پوهنتون د پرمختګ لپاره د ټولو ادارو ترمنځ ګډ کار، مسؤلانه همکاري او دوامداره اړیکه خورا مهمه ده.
وروسته د پوهنځیو رئیسانو په خپلو خبرو کې د پوهنتون او اړوند پوهنځیو د ستونزو، اړتیاوو او وړاندیزونو په اړه خبرې وکړې. هغوی ټینګار وکړ چې د پوهنتون تدریسي بلاکونو بیا ترمیم او زیربنایې برخو باندې ډیر کار وشي.

په پای کې، شیخ صاحب د ګډونوالو د نظریاتو او وړاندیزونو مننه وکړه او ژمنه یې وکړه چې د یادو ستونزو د حل لپاره به پر خپل وخت لازم ګامونه پورته کړي. او زیاته یې کړه چې د پوهنتون اداره هڅه کوي چې ټولو پوهنځیو ته د اسانتیاوو برابرولو، د اداري بهیر د منظمولو او د شفاف کاري چاپېریال د رامنځته کولو په برخه کې لازم اقدامات وکړي.

د نشراتو او عامه اړیکو عمومي مدیریت
دوشنبه، ۱۳، ربیع الثاني،۱۴۴۷هـ.ق — ۱۴، مېزان، ۱۴۰۴ هـ.ش