د غزني پوهنتون دعوت ارشاد آمریت لوري استادانو، اداري کارکوونکو او محصلینو ته د امربالمعروف او نهی عن المنکر وزارت د قانون د تشریح اړوند معلوماتي سیمینار وړاندې شو.
قمري نېټه: شوال ۱۵، ۱۴۴۶ هـ.ق
لمريز نېټه: وري ٢٥، ۱۴۰۴ هـ.ش
مېلادي نېټه: اپرېل ١۴، ۲۰۲۵م
نن ورځ په غزني پوهنتون کې د امربالمعروف او نهی عن المنکر وزارت د قانون د ښه تطبیق په موخه د جوړي شوي کمېټې د پریکړو سره سم استادانو، اداري کارکوونکو او محصلینو ته د یاد قانون د تشریح اړوند معلوماتي سیمینار وړاندې شو.
یاده ناسته د قرآن کریم د مبارکو آیتونو په خوږ تلاوت سره پرانیستل شوه، چې له روحانیت او برکت څخه ډکه فضا یې رامنځته کړه. ورپسې د غزني پوهنتون د دعوت او ارشاد آمر، مولوي نقیب احمد منذر، پرانیستونکې وینا وکړه. نوموړي په خپله وینا کې د غونډې د هدف او اهمیت په اړه خبرې وکړې او د امر بالمعروف او نهی عن المنکر وزارت د قانون د ښه تطبیق اړوند یې پراخ وضاحت وړاندې کړ. هغه ټینګار وکړ، چې یاد قانون باید په پوهنتون کې د اسلامي اصولو او ټولنیز نظم د پیاوړتیا لپاره په مؤثر ډول عملي شي، تر څو یو سالم او دیني چاپېریال تضمین شي.
ورپسې د غزني پوهنتون د علمي چارو مرستیال، مولوي محمد حیدر حمزه، د امر بالمعروف او نهی عن المنکر وزارت د قانون مادې تشریح او په اړوند یې هر اړخیز معلومات له ګډونوالو سره شریک کړل. نوموړي د یاد قانون د شرعي بنسټونو، حقوقي اصولو، تطبیقي لارو چارو، او د عملي کولو مهمو اړخونو ته اشاره وکړه. هغه روښانه کړه، چې دغه قانون نه یوازې د فردي اصلاح لپاره مهم دی، بلکې د ټولنیز نظم، اخلاقي ارزښتونو، او اسلامي چاپېریال د رامنځته کېدو لپاره هم حیاتي رول لري. نوموړي د پوهنتوني چاپېریال لپاره د دغه قانون د تطبیق مشخصې طریقې هم بیان کړې او له استادانو، محصلینو، او کارکوونکو یې وغوښتل چې د دې قانون ملاتړ وکړي او په عملي کولو کې خپله ونډه واخلي.
د نشراتو او عامه اړیکو عمومي مدیریت.
