غزني پوهنتون کې محصلینو ته له ازموینو څخه د وېري (اضطراب) د مخنیوي او د پسرلني سمیستر وروستیو ازموینو ته د غوره چمتووالي په موخه روزنیز او معلوماتي سمینار ترسره شو.

غزني پوهنتون کې د محصلانو چارو معاونیت په نوښت محصلینو ته له ازموینو څخه د وېري (اضطراب) د مخنیوي او د پسرلني سمیستر وروستیو ازموینو ته د غوره چمتووالي په موخه روزنیز او معلوماتي سمینار ترسره شو.
په دغه سمینار کې د ارواپوهنې څانګې استاد پوهنمل حسن خان درمل له لوري محصلینو ته د ازموینې پر مهال د رواني فشار او وېري کمولو، د مطالعې د اغېزمنو لارو چارو، د وخت د مدیریت، او د مثبت ذهنیت د رامنځته کولو په اړه هر اړخیز معلومات وړاندې شول.
همداراز د محصلانو چارو مرستیال مفتي عزت الله نوري هم د وینا پر مهال پر ځان د باور او له خپلو وړتیاوو څخه د اعظمي ګټي اخیستنې په خبري وکړې او ویې ویل چې له ازموینو څخه وېره یو عام حالت دی، خو د مناسبو مهارتونو، منظمې مطالعې او ذهني تمرینونو په وسیله یې په اسانۍ سره مخنیوی کېدای شي. او محصلین یې وهڅول چې د مطالعې پلان جوړ کړي او د ازموینو پر مهال ارام او باوري پاتې شي.

باید وویل شي چې دغه سمینار د محصلینو د علمي او رواني ملاتړ په برخه کې یو اغېزمن ګام بلل کیږي، چې موخه یې د ازموینو پر مهال د محصلینو د لا ښه چمتووالي او بریا ترلاسه کول دي.

د نشراتو او عامه اړیکو عمومي مدیریت
دوشنبه
۱۴۴۷/۰۱/۰۶ هـ.ق
۱۴۰۵/۰۴/۰۱ هـ.ش
۲۰۲۶/۰۶/۲۲ م