غزني پوهنتون کې د کیفیت لوړاوي او اداري چارو د لا ښه تنظیم په موخه د څلور ګونو معاونیتونو کلنۍ ارزونه پیل شوه.

غزني پوهنتون کې د عمومي رئیس شیخ مولوي عبدالمالک محسن له لوري د اداري چارو د لا ښه تنظیم، شفافیت او د کیفیت د لوړولو په موخه د څلور ګونو معاونیتونو کلنۍ ارزونه پیل شوه.
یاده ارزونه د تضمین کیفیت له لوري د ورکړل شوي چک لېست پر اساس ترسره کیږي.
چې نن ورځ يې د محصلانو چارو معاونیت ارزونه ترسره کړه؛ د دغې ارزونې پرمهال د یاد معاونیت اداري بهیرونه، د خدماتو کیفیت، د اسنادو تنظیم، د محصلانو ستونزو ته رسېدنه او د چارو اغېزمنتیا هر اړخیزه وکتل شوه.
همداراز د محصلانو چارو معاونیت اړوند د ټولو کمېټو بېلابېل اسناد او کړنې وارزول شوې او د چارو د لا ښه والي لپاره لازمې سپارښتنې هم وشوې. د ارزونې ټیم ټینګار وکړ چې د پوهنتون ټول اداري واحدونه باید د تضمین کیفیت اصولو ته ځانګړې پاملرنه وکړي څو د لوړو زده کړو په بنسټونو کې د خدماتو کیفیت لا لوړ شي.

عمومي رئیس د دغې ارزونې موخه د اداري بهیرونو اصلاح، د شفافیت پیاوړتیا او محصلانو ته د غوره خدماتو برابرول یاد کړل او زیاته یې کړه چې ورته ارزونې به په دوامداره توګه ترسره کېږي.

د نشراتو او عامه اړیکو عمومي مدیریت
نېټه: دوشنبه
۱۴۴۷هـ.ق، رمضان المبارک ۲۰ مه
۱۴۰۴هـ.ش، حوت ۱۸ مه
۲۰۲۶م، مارچ ۹ مه