غزني پوهنتون کې د کمپيوټر ساینس پوهنځي استادانو ته په څېړنو کې د مصنوعي ځيرکتیا کارونه او د ژورنالونو پېژندنې اړوند معلوماتي سمینار ترسره شو.

 غزني پوهنتون کې د کمپیوټر ساینس پوهنځي استادانو ته په څېړنیزو چارو کې د مصنوعي ځيرکتیا (Artificial Intelligence) د اغېزمن استعمال او د معتبرو علمي ژورنالونو د پېژندنې په موخه هر اړخیز معلوماتي سمینار ترسره شو.
یاد سمینار د پوهنځي د علمي کادرونو د څېړنیزو وړتیاوو د لوړولو او د نوې ټکنالوژۍ له امکاناتو څخه د سمې استفادې په موخه جوړ شوی و، چې پکې د یاد پوهنځي استادانو، علمي څېړونکو او د غزني ولایت د مخابراتو او معلوماتي ټکنالوژۍ ریاست استازې ګډون کړی وو.
 چې د پوهنیار استاد فرید احمد درمل له لوري د مصنوعي ځيرکتیا پر بنسټ د څېړنو د ترسره کولو نوې لارې چارې، د علمي مقالو د لیکلو اسانتیاوې، د معلوماتو تحلیل، د ادبياتو د بیاکتنې (Literature Review) چټکتیا او د اخلاقي اصولو مراعات په تفصیل سره تشریح شول. 
او همدارنګه د دغه پوهنځي د رئیس پوهندوی عبدالمتین میاڼي له لوري د نړیوالو معتبر ژورنالونو درجه‌بندۍ، د جعلي (Predatory) ژورنالونو د پېژندنې او د مقالو د خپرولو د معیارونو په اړه ګټور معلومات وړاندې شول.
ګډونوالو دا سمینار د وخت له غوښتنو سره سم او د څېړنیزو فعالیتونو د پیاوړتیا لپاره مهم وباله او هیله یې وښوده چې ورته علمي او مسلکي پروګرامونه دې په دوامداره توګه ترسره شي.

د غزني پوهنتون د کمپیوټر ساینس پوهنځي مسؤلینو ټینګار وکړ چې د مصنوعي ځيرکتیا سمه او مسؤلانه کارونه کولی شي د استادانو څېړنې لا معیاري، اغېزمنې او نړیوالو معیارونو ته نږدې کړي، او پوهنتون به په راتلونکي کې هم د علمي ظرفیت لوړولو ته ځانګړې پاملرنه وکړي.

نېټه: یکشنبه
۱۴۴۷هـ.ق، د رجب المرجب ۲۷ ـمه
۱۴۰۴هـ.ش، د جدي ۲۷ مه
۲۰۲۶م، د جنوري ۱۸ مه
د نشراتو او عامه اړیکو عمومي مدیریت