غزني پوهنتون کې د دیني او جهادي مدارسو د علماوو او فاضلانو د شپږ ورځنۍ ازموینې بهیر د ارزونې په موخه د لوړو زده کړو وزارت د محصلانو چارو معین د یادو ازموینو له صحنو ځانګړې لیدنه ترسره کړه.
غزني پوهنتون کې د دیني او جهادي مدارسو د علماوو او فاضلانو د شپږ ورځنۍ ازموینې د بهیر د ارزونې په موخه، د لوړو زده کړو وزارت د محصلانو چارو معین شیخ صاحب عبدالله سیحان؛ د غزني پوهنتون د مسؤلینو او مدیره هیئت په ملتیا د ازموینو له صحنو څخه ځانګړې لیدنه ترسره کړه.
د یادې لیدنې پر مهال، د محصلانو چارو معین د ازموینو د تنظیم، شفافیت او تخنیکي بهیر له نږدې څارنه وکړه او له اړوندو مسوولینو او مدیره هیئت سره یې د ازموینې د کیفیت، اسانتیاوو او د ګډونوالو د ستونزو په اړه خبرې اترې وکړې. نوموړي د غزني پوهنتون د رهبرۍ او مسؤلینو له هڅو څخه د ازموینو د بهیر د منظموالې او هر اړخیزو اسانتیاوو د برابرولو په موخه ستاینه وکړه او ټینګار یې وکړ چې د ازموینو شفاف او معیاري ترسره کېدل د لوړو زده کړو وزارت له اساسي لومړیتوبونو څخه دي.
همدارنګه، د غزني پوهنتون مسؤلینو د ازموینې د بهیر په اړه معلومات وړاندې کړل او ډاډ یې ورکړ چې د دیني او جهادي مدارسو علماوو او فاضلانو ته د اسانتیاوو برابرولو، د اصولو رعایت او د عدالت تأمین ته ځانګړې پاملرنه شوې ده.
په ورته مهال د ازموینې ګډونوالو هم د دغي پروسې له منظموالي او ورته د هر ډول امکاناتو له برابرولو څخه خوښي څرګنده کړه.
یاده دې وي چې دا ازموینه د لوړو زده کړو وزارت له لوري د دې لپاره ترسره کېږي، څو د دیني او جهادي مدارسو فارغان د شفافې او معیاري پروسې له لارې ارزیابي او د کامیابېدو په صورت کې د لیسانس او ماسټري اسناد ورکړل شي.
د نشراتو او عامه اړیکو عمومي مدیریت
یکشنبه ، ۷ رجب المرجب ۱۴۴۷ هـ.ق— ۷ جدې۱۴۰۴هـ ش
