غزني پوهنتون کې د محصلینو ترمنځ د اسلامي ورورولۍ تر نامه لاندې اونۍ وړاندې پیل شوي د والیبال سیالۍ د ښوونې او روزنې پوهنځي په بریا پای ته ورسېدې.
غزني پوهنتون کې د محصلانو چارو معاونیت له لوري د محصلینو ترمنځ د اسلامي ورورولۍ تر نامه لاندې یوه اوونۍ مخکي په لاره اچول شوې، د والیبال سیالۍ نن ورځ د ښوونې او روزنې پوهنځي په ګټه پای ته ورسېدې.
یاده سیالۍ چې د محصلینو د بدني پیاوړتیا، سالمو تفریحي فعالیتونو، د همکارۍ او ورورګلوۍ د روحيې د پیاوړتیا په موخه جوړې شوې وه، د پوهنتون د بېلابېلو پوهنځیو ټیمونو پکې ګډون کړی و. ټیمونو د خپلې انرژۍ، ځوانۍ او ورزشي استعداد ښودلو لپاره په خورا میړانه سیالۍ ترسره کړې.
د پایلوبې لوبه د ښوونې او روزنې پوهنځي او ژبو او ادبیاتو پوهنځي ترمنځ وه؛ چې د ښوونې او روزنې پوهنځي لوبډلې په ځېرکتیا، همغږي او تخنیکي لوبې سره بریا خپله کړه او د سیالیو اتلولي یې وګټله.
د یادي لوبي د اختتامیه مراسمو پر مهال د محصلانو چارو مرستیال مفتي عزت الله نوري د ورزش په اهمیت خبرې وکړې او زیاته یې کړه چې ورزش د بدن د قوت او صحت په برخه کې رغنده رول لري؛ دارنګه یې د دواړو ټیمونو هڅې وستایلې او د هغوی ورزشي اخلاق او د ورورولۍ روحيه یې د ستاینې وړ وبلله. او ټینګار یې وکړ چې د دې ډول ورزشي پروګرامونو دوام به نه یوازې د ځوانانو وړتیاوې راسپړي بلکې د پوهنتوني چاپېریال مثبتې اړیکې او سالم ذهنیتونه هم پیاوړي کوي.
د نشراتو او عامه اړیکو عمومي مدیریت
سه شنبه ، ۲۷ جمادی الاول ۱۴۴۷ هـ.ق— ۲۷ عقرب ۱۴۰۴ هـ.ش
