غزني پوهنتون د کرنې پوهنځي ۳۰ تنه محصلینو د خپلو عملي زده کړو او علمي سطحې د لوړاوي په موخه د سردې بند کرنیز، تولیدي او تفریحي پارک څخه د لیدنې په موخه علمي سیر ترسره کړ.
قمري نېټه: صفرالمظفر، ۲۷، ۱۴۴۷ هـ.ق
لمريز نېټه: اسد، ۳۰ ، ۱۴۰۴ هـ.ش
مېلادي نېټه: اګست، ۲۱ ، ۲۰۲۵م
تېره ورځ د غزني پوهنتونې، کرنې پوهنځي د اګرانومي او باغداري څانګو د څلورم ټولګي ۳۰ تنه محصلینو د سردې بند کرنیز، تولیدي او تفریحي پارک څخه د لیدنې په موخه علمي سیر ترسره کړ.
دغه سفر د افغانستان د ناروي کمېټې د کرنیزو استازو له لوري، د کرنې پوهنځي د استادانو په همغږۍ او لارښوونه ترسره شو، چې موخه یې د محصلینو لپاره د کرنیزو عملي تجربو تر لاسه کول او د تولیدي فعالیتونو له نږدې څارنه وه.
دغه علمي سفر چې د محصلینو لپاره د یوې ورځې په ترڅ کې ترسره شو، موخه یې دا وه چې محصلین د ناروي مؤسسې له هغو فعالیتونو څخه لیدنه وکړي چې په کرنیزه برخه کې ترسره شوي دي. په دغو فعالیتونو کې د میوې د ونو روزنه، قوریهداري او د مثمرو نیالګیو تولید، د شنو ساحو ډیزاین او د پارکونو جوړول شامل وو. د تیرو دوو کلونو په اوږدو کې د دې مؤسسې ټول فعالیتونه محصلینو ته معرفي شول او عملي بڼه یې هم ورته وښودل شوه.
همداراز، په دې پروګرام کې پوهندوی احمدرضا صالحی او پوهنمل عبدالواسع تاجزاده چې محصلینو سره ملګري وو، د پارک په بېلابېلو برخو کې د ترسره شویو فعالیتونو په اړه لازم او مفصل توضیحات وړاندې کړل.
په پای کې محصلینو خپلې پوښتنې مطرح کړې او د مؤسسې د مسئول او ورسره د تللو استادانو لهخوا ورته ځواب ورکړل شو.
د باید وویل شي چې محصلینو د داسي علمي او عملي پروګرامونو د ترسره کېدو له امله خوښي څرګنده کړه او غوښتنه یې وکړه چې پوهنتون او پوهنځی دې په دوامداره توګه دیته ورته نور پروګرامونه هم ترسره کړي.
د نشراتو او عامه اړیکو عمومي مدیریت
