د غزني پوهنتون د علمي څېړنو معاونیت له لوري د استادانو لپاره پیل شوی دوه ورځنی سمینار نن پای ته ورسېد.
سه شنبه: ۱۲/ربیع الثانی/۱۴۴۶ هـ.ق
۲۴/میزان/۱۴۰۳ هـ.ش
د غزني پوهنتون د څېړنو معاونیت، د استادانو د مسلکي ظرفیت لوړونی آمریت په همکارۍ، د استادانو د مسلکي او څېړنیز ظرفیت لوړولو په موخه دوه ورځنی سمینار ترسره کړ. د سمینار پیل د قرآن عظیم الشان د څو مبارکو آیتونو په تلاوت سره وشو. ورپسې د پوهنتون عمومي رئیس الحاج مولوي عبدالواسع منصور د دې ډول سمینارونو ګټورتیا وستایله او ویې ویل چې علمي سمینارونه د پوهې د کچې لوړوالي، د پوهنتون د استادانو ترمنځ همغږي او یووالي او علمي معلوماتو د شریکولو سبب ګرځي. هغه زیاته کړه چې استادان باید د علمي څېړنو ترڅنګ د محصلینو درسونو او د هغوی د بې ځایه وخت تېرولو مخنیوي ته هم جدي پام وکړي او خپل مسؤلیت په خپل وخت ادا کړي.
په لومړۍ ورځ د کرنې پوهنځي استاد پوهنمل روح الله کمال او د ښوونې او روزنې پوهنځي استاد پوهنمل سید رحمت الله موسوي د تحقیق په اخلاقو، د علمي تحقیقاتو په ادبي سرقت او د څېړنو په اخلاقي کودونو هر اړخیز معلومات وړاندې کړل. همدارنګه، په نړیوالو ژورنالونو کې د مقالو په عادلانه کره کتنه، د کره کتونکو دندو، قوانینو او د څېړنو په مالي موضوعاتو هم خبرې وشوې.
په دویمه ورځ، د څېړنو آمر پوهنیار فواد ناصري د نمونې اخیستنې میتودونه، څېړنیزو معلوماتو د راټولولو وسایل او لارې چارې، او په ګوګل فورم کې د آنلاین پوښتنپاڼو جوړولو اړوند مفصل معلومات وړاندې کړل.
په پای کې، د پوهنتون د علمي څېړنو معاون ښاغلي میاڼي له ټولو استادانو او د سمینار له ګډونوالو مننه وکړه.
د نشراتو او عامه اړیکو عمومي مدیریت
