غزني پوهنتون کې د پوهنځیو رئیسانو او څانګو آمرینو ته د کلني نظارت د راپور پېژندنې، ترتیب او اړوندو معیارونو د لا ښه پوهاوي په موخه یو ورځنی علمي او معلوماتي سمینار ترسره شو.
غزني پوهنتون کې د استادانو د مسلکي انکشاف آمریت او تضمین کیفیت آمریت په ګډه همکارۍ، د پوهنځیو رئیسانو او څانګو آمرینو ته د کلني نظارت د راپور پېژندنې، ترتیب او اړوندو معیارونو د لا ښه پوهاوي په موخه یو ورځنی علمي او معلوماتي سمینار ترسره شو.
دغه سمینار چې د تضمین کیفیت عمومي مدیر دوکتور محمد مهدي رضایي او د کرنې پوهنځي استاد پوهندوي محمد مسعود نیکنام له لوري وړاندې شو؛ پکې ګډونوالو ته د کلني نظارت راپور د اهمیت، د راپور د معیاري ترتیب، د فعالیتونو د مستندسازۍ، د لاسته راوړنو او ننګونو د انعکاس او د اړوندو معلوماتو د منظم ثبت په اړه لازم علمي او عملي معلومات وړاندې شول.
همدارنګه د سمینار په ترڅ کې د پوهنځیو او څانګو د فعالیتونو د ارزونې او د کیفیت د لا ښه والي په موخه د کلني نظارت د راپور د اغېزمن چمتو کولو پر لارو چارو بحث وشو او د ګډونوالو پوښتنو ته اړوند ځوابونه وړاندې شول.
د یادونې وړ ده چې د نني سمینار موخه د مسؤلینو د راپور جوړونې ظرفیت لوړول، د فعالیتونو د دقیقې مستندسازۍ پیاوړتیا او د پوهنتون په علمي او اداري چارو کې د لا ډېر نظم او کیفیت رامنځته کول وو.
د نشراتو او عامه اړیکو عمومي مدیریت
سه شنبه
۱۴۴۸/۰۳/۲۵ هـ.ق
۱۴۰۵/۰۶/۱۷ هـ.ش
۲۰۲۶/۰۹/۰۸م
