غزني پوهنتون کې د ۱۴۰۴ هـ ش کال د خزاني سمیستر وروستۍ ازموینې په بشپړ نظم او شفافیت سره پای ته ورسېدې.
غزني پوهنتون کې د ۱۴۰۴ هـ ش کال د خزاني سمیستر وروستۍ ازموینې، چې د پوهنتون د رهبرۍ، د پوهنځیو د استادانو او د ازموینو د کمېټو تر منظم نظارت لاندې ترسره کېدې، په بریالیتوب، بشپړ نظم او پوره شفافیت سره نن ورځ پای ته ورسېدې.
یادې ازموینې د ټاکلي مهالوېش له مخې په ټولو پوهنځیو او څانګو کې واخیستل شوې، چې په ترڅ کې یې د ازموینو د اصولو او مقرراتو جدي رعایت وشو. د ازموینو د بهیر د ښه مدیریت، د ناظرینو پر وخت حضور، د ازموینې مناسب چاپېریال او د درسي عدالت تأمین هغه مهم ټکي وو چې د محصلینو له لوري هم وستایل شول.
د غزني پوهنتون مسؤلینو د ازموینو د بهیر پر مهال د هر ډول احتمالي ستونزو د مخنیوي لپاره لازم تدابیر نیولي وو او ټینګار یې وکړ چې د علمي شفافیت، عدالت او د محصلینو د حقونو ساتنه د پوهنتون له اساسي لومړیتوبونو څخه ده.
محصلینو هم د ازموینو له بهیر څخه خپل رضایت څرګند کړ او د پوهنتون د رهبرۍ او استادانو له هڅو یې مننه وکړه، چې ورته یې یو منظم، ارام او باوري د ازموینو چاپېریال برابر کړی و.
د یادونې وړ ده چې غزني پوهنتون هر کال هڅه کوي تر څو د تحصیلي او د ازموینو چارو د کیفیت د لوړولو لپاره اغېزمن ګامونه پورته کړي او د سالمې علمي فضا په رامنځته کولو سره د هېواد د راتلونکو مسلکي کدرونو د روزنې په برخه کې خپل مسؤلیت په ښه توګه ترسره کړي.
د نشراتو او عامه اړیکو عمومي مدیریت
دوشنبه ، ۲۴ جمادی الثاني ۱۴۴۷ هـ.ق— ۲۴ قوس۱۴۰۴ه ش
