غزني پوهنتون کې د کمپیوټر ساینس پوهنځي نويو محصلینو ته د پوهنځي د پیژندنې او له کریډیټ سیستم سره د بلدتیا اړوند معلوماتي سیمینار وړاندې شو.
قمري نېټه: صفرالمظفر، ٢٩، ۱۴۴۷ هـ.ق
لمريز نېټه: سنبله، ١ ، ۱۴۰۴ هـ.ش
مېلادي نېټه: اګست، ٢٣ ، ۲۰۲۵م
غزني پوهنتون کې د کمپیوټر ساینس پوهنځي په نوښت، د لومړي ټولګي محصلینو ته د پوهنځي د پیژندنې او د کریډیټ سیستم د وضاحت او له دغه سیستم سره د بلدتیا په موخه ځانګړی سیمینار ترسره شو.
د سیمینار پیل د قرآن کریم د مبارک آیتونو په تلاوت سره وشو.
ورپسې د یاد پوهنځي رئیس پوهنمل عبدالمتین میاڼي محصلینو ته د ښه راغلاست تر څنګ د کمپیوټر ساینس پوهنځي د علمي ارزښت، نويو ټکنالوژیو د زده کړې اړتیا او د محصلینو د راتلونکو زده کړو په اړه خبرې وکړې.
وروسته د دغه پوهنځی استاد پوهنمل فرید احمد درمل د کمپيوټر ساینس پوهنځی د پیژندنې اړوند هر اړخیز معلومات وړاندې کړل. دارنګه د یاد پوهنځي یو بل تن استاد مقداد مهری د کریډیټ سیستم، د مضمونونو د اخیستلو، د ازموینو د څرنګوالي او د علمي کړنلارې په اړه محصلینو ته معلومات وړاندې کړل. دوی ټینګار وکړ چې د کریډیټ سیستم د محصلینو لپاره د زده کړو ښه فرصتونه برابروي او د نړیوالو معیارونو سره سمون لري.
نشراتو او عامه اړیکو عمومي مدیریت
