غزني پوهنتون کې د کتابتون د څارنې او معلوماتي سرچینو څخه د استفادې اړوند د مشورتي پلاوي ناسته ترسره شوه.
غزني پوهنتون کې د عمومي رئیس الحاج مولوي عبدالواسع منصور په مشرۍ، د پوهنځیو د رئیسانو او څانګو آمرینو له لوري د کتابتون د څارنې او معلوماتي سرچینو د اغېزمنې استفادې په تړاو مشورتي ناسته ترسره شوه.
د ناستې موخه د پوهنتون د کتابتون د خدماتو د ښه والي، د معیاري څارنې میکانېزم رامنځته کول، او د علمي سرچینو د اسانه لاسرسي لارې چارې ارزول او پیاوړتیا وه.
د غونډې په پیل کې عمومي رئیس ښاغلي منصور د ګډونوالو هرکلی وکړ او د کتابتون د علمي ارزښت او د پوهې د ترویج په برخه کې د هغه د رول په اړه یې مفصلې څرګندونې وکړې. نوموړي زیاته کړه:
"کتابتون د پوهنتون زړه دی، او موږ باید هڅه وکړو چې دا زړه په عصري بڼه ټکیدونکی وساتو، څو زموږ محصلین او استادان وکولای شي له علمي منابعو اعظمي ګټه پورته کړي."
د غونډې ګډونوالو د کتابتون د فعالیتونو د لا اغېزمنېدو لپاره ګڼې طرحې او سپارښتنې وړاندې کړې. په دغو سپارښتنو کې د کتابتون د سیسټم پراختیا، د محصلینو د پوهاوي پروګرامونه، او د ملي او نړیوالو علمي بنسټونو سره د اړیکو پیاوړتیا شاملې وې.
ناسته د عملي پرېکړو او راتلونکو ګامونو په ټاکلو سره پای ته ورسېده، او ټینګار وشو چې د کتابتون د ودې او د معلوماتي سرچینو د اغېزمنې استفادې لپاره به ګډې هڅې دوام وکړي.
د نشراتو او عامه اړیکو عمومي مدیریت
شنبه، ۱۸، ربیع الثاني،۱۴۴۷هـ.ق — ۱۹، مېزان، ۱۴۰۴ هـ.ش
