غزني پوهنتون کې د پسرلني سمیستر وروستنۍ ازموینې په منظم او رسمي ډول او د پوره شفافیت له مخي پیل شوې.
قمري نېټه: محرم الحرام ۹، ۱۴۴۶ هـ.ق
لمريز نېټه: سرطان ۱۴، ۱۴۰۴ هـ.ش
مېلادي نېټه: جولای ۵، ۲۰۲۵م
نن ورځ په غزني پوهنتون کې د پسرلني سمیستر وروستنۍ ازموینې د لوړو زده کړو وزارت د هدایت سره سم؛ په پوره شفافیت او ډاډمنه فضأ کې پیل شوې. دا ازموینې د پوهنتون د مختلفو پوهنځیو او څانګو محصلینو لپاره په منظم ډول تنظیم شوې دي.
د ازموینو په لومړۍ ورځ د غزني پوهنتون د علمي چارو مرستیال مولوي محمد حیدر حمزه، د استادانو چارو آمر پوهنمل نقیب الله حقاني او د ښوونې او روزنې پوهنځي رئیس پوهنمل ګل حبیب حنفي د ازموینو له صحنو څخه د ارزوونې په موخه لیدنه ترسره کړه.
د دغې لیدنې پرمهال ښاغلي حمزه د استادانو او محصلینو د ستونزو پوښتنه وکړه او زیاته یې کړه چې موږ هڅه کړې چې سږکال هم د تیرو کلونو په څېر د ازموینو پروسه د شفافیت، نظم او عدالت پر بنسټ ترسره کړو. محصلین باید له دې فرصته سالمه استفاده وکړي او خپل علمي ظرفیتونه وښيي."
محصلین هم د ازموینو پیل د ښه نظم، پوره شفافیت، ارامه او مناسب چاپیریال څخه خوښي ښيي،
د یادونې وړ ده چې غزني پوهنتون دا مهال د ۶ پوهنځیو او لسګونو څانګو په لرلو سره زرګونه محصلین روزي. د پوهنتون مشرتابه ژمن دی چې د علمي شفافیت، پرمختګ او زدهکړو کیفیت ته لومړیتوب ورکړي.
د نشراتو او عامه اړیکو عمومي مدیریت
