غزني پوهنتون کې د نوي رئیس صاحب د ښه راغلاست او پېژندنې، او مخکینې رئیس صاحب د مخه ښې مراسم د یوې رسمې غونډې په ترڅ کې ترسره شول.

د عالیقدر امیرالمؤمنین حفظه الله تعالی ورعاه د حکم په اساس د هیواد د څو ولایتونو د پوهنتونونو د رئیس صاحبانو د تغیر او تبدیل په ترڅ کې نن ورځ د غزني پوهنتون نوی رئیس شیخ مولوي عبدالمالک محسن د ښه راغلاست او پېژندنې او د مخکیني رئیس الحاج مولوي عبدالواسع منصور د مخه‌ښې مراسم د یوې شانداره غونډې په ترڅ کې ترسره شول.
په دغه غونډه کې د پوهنتون نوي رئیس صاحب او ورسره مل پلاوي، د غزني ولایت مقام استازې او مسؤلینو، علماوو، د غزني پوهنتون مخکینی رئیس صاحب، معاون صاحبانو، د پوهنځیو رئیسانو،  استادانو او اداري کارکوونکو ګډون کړی وو.
چې پیل یې د قرآن پاک د مبارکو ايتونو په تلاوت سره  وشو.
وروسته د افغان ټیلي کام رئیس مولوي اسدالله فیضاني او د پوهنې وزارت د معلوماتي ټکنالوژۍ  عمومي رئیس مولوي کفایت الله د مسؤلیت اړوند هر اړخیزي خبري وکړې او دارنګه یې د دینې زده کړو ترڅنګ په عصري علومو او د نویو تخنیکونو د زده کړې په اهمیت هم خبري وکړې او له مسؤلینو څخه یې وغوښتل چې دغي برخې ته زیاته توجه وکړي او خپل خدمات لا ګړندي کړي.
ورپسې نوي رئیس شیخ مولوي عبدالمالک محسن خپلي خبري وکړې. هغه د امیرالمؤمنین شېخ صاحب او د وزارت د مشرتابه له باور څخه مننه وکړه او ژمنه یې څرګنده کړه چې د کیفیت لوړولو، بنسټیزو خدمتونو پیاوړتیا، شفاف سیستم، څېړنیزو فعالیتونو پراختیا او د محصلینو د ظرفیت لوړولو لپاره به ټولې ممکنې هڅې کوي. نوموړي د یو پیاوړي، بااعتماد او نوښتګر علمي چاپېریال د رامنځته کولو پر اهمیت باندې هم ټینګار وکړ.
دارنګه د غزني پوهنتون د علمې چارو مرستیال مولوي محمد حیدر حمزه نوي رئیس صاحب ته د پوهنتون د مسؤلینو او کارکوونکو په نماینده ګې مبارکې او ښه رغلاست وویل او له مخکیني رئیس صاحب څخه یې په دغه پوهنتون کې د کړو خدمتونو د مننې او قدرداني ترڅنګ د الله تعالی ج له دربار نه د لا نورو ښو خدمتونو د توفیق غوښتنه وکړه.
په اخیر کې مخکیني رئیس الحاج مولوي عبدالواسع منصور په خپلو څرګندونو کې وویل چې دده د دورې بریالیتوب د ټیمي همکارۍ پایله وه، او د پوهنتون د ټولو استادانو او کارکوونکو نه یې د زړه له کومې مننه وکړه. نوموړي هیله څرګنده کړه چې نوی رهبري ټیم به په لا زیاتې هڅې سره د پوهنتون د علمي ودې او بنسټیزو خدمتونو په برخه کې لا نور پرمختګونه راولي.
غونډه د دعا په وینا پای ته ورسېده، او ګډونوالو د دواړو رئیس صاحبانو لپاره د لا زیاتو بریاوو او خدموتونو هیله څرګنده کړه.

د نشراتو او عامه اړیکو عمومي مدیریت
پنج شنبه ، ۲۹ جمادی الاول ۱۴۴۷ هـ.ق— ۲۹ عقرب ۱۴۰۴ هـ.ش