غزني پوهنتون کې د شپږګونو پوهنځیو محصلینو ته په کریډیټ سیستم او محصل ژمنلیک باندې د ښه پوهاوي اړوند معلوماتي سمینار ترسره شو.

غزني پوهنتون کې د محصلانو چارو معاونیت له لوري د شپږګونو پوهنځیو محصلینو ته د کریډیټ سیستم او محصل ژمنلیک په اړه هر اړخیز معلوماتي سمینار ترسره شو.
د یاد سمینار موخه د لوړو زده کړو وزارت او پوهنتون له اصولو، لوایحو او مقرراتو سره د محصلینو بلدتیا او د محصل ژمنلیک ښه تطبیق او ورته ژمن پاتي کېدل وو.
دغه سمینار د بېلابیلو پوهنځیو د استادانو له لوري وړاندې شو چې پرمهال یې محصلینو ته د کریدیټ سیستم پر پېژندنه، د اصلي، تخصصي او پوهنتون شموله مضامینو او د محصل ژمنلیک اړوند هر اړخیز معلومات له محصلینو سره شریک شول؛ او غوښتنه ورڅخه وشوه چې د لوړو زده کړو وزارت قوانین او مقررات مراعات او د نوي ژمنلیک سره ځانونه په شرعي طریقه برابر او یاد ژمنلیک ته ژمن پاتي شي. 
دغه ډول پروګرامونه د محصلینو د ظرفیت لوړولو او د عصري تحصیلي معیارونو د پلي کولو په برخه کې مهم بلل کېږي او تمه ده چې په راتلونکي کې به هم دوام ومومي.

د نشراتو او عامه اړیکو عمومي مدیریت
نېټه: چهارشنبه
۱۴۴۷هـ.ق، شوال المکرم ۲۱ مه
۱۴۰۵هـ.ش، حمل ۱۹ مه
۲۰۲۶م، اپریل ۸ مه