غزني پوهنتون کې د دعوت او ارشاد کمېټې ۱۳ تنه بااستعداده او فعال محصلین د غوره کړنو، اغېزمنو فعالیتونو او مثبتې ونډې له امله د یوې ځانګړې غونډې په ترڅ کې وستایل شول.
غزني پوهنتون کې د دعوت او ارشاد آمریت د یوې ځانګړې غونډې په ترڅ کې د یاد آمریت اړوند کمېټې ۱۳ تنه بااستعداده او فعال محصلین د غوره کړنو، اغېزمنو فعالیتونو او مثبتې ونډې له امله وستایل.
یاده ستاینغونډه د پوهنتون په مسجد شریف کې د څلورو معاونیتونو معاون صاحبانو، د پوهنځیو د رئیسانو، استادانو، اداري کارکوونکو او محصلینو په ګډون ترسره شوه.
جوړي شوې غونډې ته د مالي او اداري مرستیال الحاج شیخ عبدالهادي ذوالهادي د خبرو پرمهال د دعوت او ارشاد آمریت د کړنو ستاینه وکړه او ویې ویل: چې د محصلینو هڅونه د پوهنتون د پرمختګ مهم اصل دی او دغه ډول پروګرامونه د محصلینو د لا زیاتو هڅو، مسؤلیت منلو او سالم فکري چاپېریال د رامنځته کېدو لامل ګرځي.
هغه زیاته کړه چې ستایل شوو محصلینو د دعوتي، فرهنګي او ټولنیزو فعالیتونو په ترسره کولو کې ځانګړې لاسته راوړنې لرلې او د هغوی هڅې باید د نورو محصلینو لپاره د الهام سرچینه وګرځي.
دارنګه د علمي چارو مرستیال مولوي محمد حیدر حمزه هم دیاد آمریت له کړنو ستاینه وکړه او د اسلامي نظام له لوري د ورکړل شوو قربانیو اړوند یې خبرې وکړې او له محصلینو څخه یې غوښتنه وکړه چې تل باید فکري مبارزین واوسي او خپلي هڅې دوامداره وساتي.
په پای کې یاد شوو ۱۳ تنه محصلینو ته د ستاینلیکونو د ورکړي ترڅنګ د دوی له هڅو او لاسته راوړنو ستاینه وشوه.
د نشراتو او عامه اړیکو عمومي مدیریت
چهارشنبه ، ۱۹ جمادی الثاني ۱۴۴۷ هـ.ق— ۱۹ قوس۱۴۰۴ه ش
