غزني پوهنتون کې استادانو او اداري کارکوونکو ته د نبوي سیرت، سنتو د پیروۍ او د وظیفوي غفلت د زیانونو په اړه دیني او اصلاحي سمینار ترسره شو.

غزني پوهنتون کې د استادانو او اداري کارکوونکو د دیني، اخلاقي او مسلکي پوهاوي د لوړولو په موخه د «د رسول الله ﷺ د مبارک ژوند، طریقې او سنتو د پیروۍ ارزښت او له شریعي اړخه د وظیفوي غفلت زیانونه» تر سرلیک لاندې دیني او اصلاحي سمینار ترسره شو.
دغه سمینار د علمي مرستیال مولوي محمد حیدر حمزه له لوري وړاندې شو چې پر مهال یې د رسول الله ﷺ د سپېڅلي ژوند، غوره اخلاقو، امانتدارۍ، عدالت، اخلاص او د سنتو د عملي کولو پر اهمیت هر اړخیزې خبرې وکړې او ټینګار یې وکړ چې د نبوي سیرت پیروي د فردي اصلاح، ټولنیز ثبات، د کورنۍ او اداري بریا بنسټ جوړوي.
همدارنګه، د سمینار ګډونوالو ته یې د اسلامي شریعت له نظره د وظیفوي غفلت، بې‌پروايۍ او د سپارل شویو مسؤلیتونو د نه ادا کولو د دیني، اخلاقي او ټولنیزو زیانونو په اړه مفصل معلومات وړاندې کړل.  او زیاته یې کړه چې امانتدارۍ، وخت ته ژمنتیا، عدالت او د وظیفوي مسؤلیتونو په سمه توګه ترسره کول د اسلامي ارزښتونو مهمې غوښتنې دي او د ادارو د پرمختګ او خلکو د رضایت لپاره بنسټیز رول لري.
نو باید خپلو مسؤلیتونو ته ښه متوجه او په منظم او د پوره اخلاص له مخي یې ترسره کړئ.

د یادونې وړ ده چې د دعوت او ارشاد آمریت له لوري هم د پوهنتون ټولو مسؤلینو، استادانو او کارکوونکو ته دوامداره دیني او اصلاحي برنامې ترسره کیږي.

د نشراتو او عامه اړیکو عمومي مدیریت
یکشنبه
۱۴۴۸/۰۲/۱۸ هـ.ق
۱۴۰۵/۰۵/۱۱ هـ.ش
۲۰۲۶/۰۸/۰۲م