غزني پوهنتون مسؤلینو، استادانو او اداري کارکوونکو ته د تضمین کیفیت او اعتبار ورکولو د یولس ګونو معیارونو په اړه معلوماتي سیمینار وړاندې شو.
قمري: ٢٣ رمضان المبارک ۱۴۴۶
لمریز: ۳ (حمل) ۱۴۰۴
میلادي: ٢٣ مارچ ۲۰۲۵
د غزني پوهنتون مسؤلینو، استادانو او اداري کارکوونکو ته د تضمین کیفیت او اعتبار ورکولو د یولس ګونو معیارونو اړوند یو مهم معلوماتي سیمینار وړاندې شو. دا سیمینار د مسلکي پرمختګ د آمريت له لوري تنظیم شوی وو، چې د تحقیقاتو معاون، پوهندوی احسان الله کامران له لوري وړاندې شو، چې موخه یې د لوړو زده کړو د کیفیت لوړول او د نړیوالو معیارونو سره سمون موندل وو.
په دغه سیمینار کې د پوهنتون مسولینو، استادانو او اداري کارکوونکو ګډون کړی وو. پوهندوی احسان الله کامران د تضمین کیفیت د اهمیت، معیارونو، تطبیق، او په پوهنتونونو کې د کیفیت لوړولو لپاره اړینو اقداماتو په اړه تفصیلي معلومات وړاندې کړل.
نوموړي زیاته کړه، چې د تضمین کیفیت یولس معیارونه، چې د لوړو زده کړو د تنظیم لپاره ټاکل شوي، د پوهنتونونو پرمختګ او نړیوال اعتبار ترلاسه کولو لپاره حیاتي دي. هغه د دغو معیارونو پر بنسټ د پوهنتون د لا ښه مدیریت، تدریس، څیړنو او اکادمیک فعالیتونو د پرمختګ پر اړتیا ټینګار وکړ.
د سیمینار ګډونوالو د موضوع اړوند خپلې پوښتنې مطرح کړې او د کیفیت د تضمین د لا ښه تطبیق لپاره یې خپلې نظریې او وړاندیزونه شریک کړل.
په پای کې، د غزني پوهنتون د علمي چارو مرستیال، د دې ډول سیمینارونو د دوام غوښتنه وکړه، ترڅو د پوهنتون د کیفیت لوړېدو ته لا زیات پام وشي او د نړیوالو معیارونو سره سم اصلاحات رامنځته شي.
د نشراتو او عامه اړيکو عمومي مدیریت
