د غزني پوهنتون په لیلیه کې مېشتو محصلینو ته د علم فضیلت، د وخت ارزښت او دیني اصولو په اړه مهم علمي او تربیوي بیان وړاندې شو.
تېره شپه د غزني پوهنتون په مسجد کې د محصلانو چارو مرستیال مفتي عزت الله نوري له لوري د محصلینو د فکري او علمي ودې په موخه یو ارزښتناک علمي او تربیوي بیان ترسره شو، د یاد علمي بیان پرمهال مفتي صاحب نوري د علم پر فضیلت، د وخت پر ارزښت او د دیني اصولو پر اهمیت هر اړخیزه وینا او معلومات وړاندې کړل؛ او ویې ویل چې علم د انسان د پرمختګ بنسټ دی او د اسلامي لارښوونو له مخې د علم حاصلول د هر مسلمان نارینه لپاره فرض ګڼل شوی دی. هغوی زیاته کړه چې ځوانان باید له شته فرصتونو اعظمي ګټه واخلي او خپل راتلونکی د زدهکړې له لارې روښانه کړي.
همداراز يې د وخت پر ارزښت خبرې وکړې او محصلینو ته یې یادونه وکړه چې وخت یو نه جبرانېدونکې سرمایه ده. او زیاته يې کړه چې بریالي کسان هغه دي چې خپل وخت په سمه توګه تنظیم کړي او بې ځایه ضایع کېدو ته یې پرېنږدي. او په اخیر کې یې محصلینو ته د لوړو زده کړو وزارت لارښوونې بیان کړي چې پکې دیني ارزښتونو ته زیاته توجه، د استادانو احترام او په خپل منځ کې د اخوت او ورورولي ژوند تېرول او ځانونه په شرعي او محمدي طریقه جوړول شامل وو.
د نشراتو او عامه اړیکو عمومي مدیریت
نېټه: چهارشنبه
۱۴۴۷هـ.ق، شوالمکرم ۱۴ مه
۱۴۰۵هـ.ش، حمل ۱۲ مه
۲۰۲۶م، مارچ اپریل ۱ اوله
