د غزني پوهنتون زدهکړیالانو ته د روشن مخابراتي شرکت په مالي ملاتړ د "آنلاین زده کړو او آنلاین کتابتون" تر عنوان لاندې یو ورځنی علمي او معلوماتي سیمینار وړاندې شو.
نېټه:
هجري قمري: ١٣ جمادیالثاني ۱۴۴۶
هجري شمسي: ٢٥ قوس ۱۴۰۳
میلادي: ١٥ دسمبر ۲۰۲۴
نن ورځ د غزني پوهنتون زده کړیالانو ته د روشن مخابراتي شرکت په مالي ملاتړ د "آنلاین زده کړو او آنلاین کتابتون" تر عنوان لاندې یو ورځنی علمي او معلوماتي سیمینار وړاندې شو، د سیمینار پرانیسته د قران کریم په مبارکو آیتونو وشوه.
وروسته د محصلانو چارو مرستیال، انجنیر محمد عثمان منیب، د ټکنالوژۍ د ګټې اخیستنې په اړه محصلینو ته وینا وکړه، هغه د انټرنیټ د ارزښت په اړه هر اړخیز معلومات وړاندې کړل، او همدارنګه یې له انټرنیټ څخه د مثبتي استفادې او د وخت مدیریت په اړه یې خبري وکړې، او زیاته یې کړه چې څنګه کولای شو په ټاکلي وخت کې خپلو موخو ته ورسېږو.
ورپسې د روشن مخابراتي شرکت د سویل ختیځ زون مسؤل، احمد میا غزنوي، د غزني پوهنتون له رهبرۍ مننه وکړه، چې د سیمینار د ترسره کولو لپاره امکانات او سرچینې برابرې کړې دي، نوموړي وویل: "تاسو د وطن راتلونکی یاست، نو باید خپل وخت مدیریت کړئ، له موجودو امکاناتو اعظمي ګټه واخلئ او خپلو اهدافو ته په ټاکلي وخت ورسېږئ."
د احمد میا غزنوي له خوا د روشن مخابراتي شرکت فعالیتونه، په ځانګړي ډول په غزني ولایت کې د ۴جي انټرنیټ خدماتو اړوند معلومات وړاندې کړل، نوموړي د پوهنتون ساحه کې یو مخابراتي سایټ د جوړښت ژمنه هم وکړه او د محصلینو لپاره یې د روشن د الفا خدماتو په اړه خبرې وکړې.
همدارنګه د غزني پوهنتون د ټکنالوژۍ عمومي مدیر، وحیدالله عمریار، د الکترونیکي زده کړو او د الفا خدماتو په اړه معلومات وړاندې کړل. هغه لاندې ټکي روښانه کړل:
۱. د الکترونیکي زدهکړو پېژندنه
۲. د الکترونیکي زدهکړو ځانګړتیاوې او اهمیت
۳. د الکترونیکي زدهکړو ډولونه
۴. د الکترونیکي زدهکړو په وړاندې پراته خنډونه او ستونزې
۵. له آنلاین سرچینو څخه موثره ګټه اخیستنه
نوموړي همدارنګه د غزني پوهنتون د آنلاین کتابتون څخه د ګټې اخیستنې په اړه هر اړخیز معلومات وړاندې کړل.
په پای کې د روشن مخابراتي شرکت د فروشاتو مسؤل، طارق احمد عمریار، د روشن الفا خدماتو په اړه محصلینو ته معلومات وړاندې کړل او د دې خدماتو او وړاندیزونه په اړه یی معلومات ارایه کړل.
او سیمینار د دعا په ویلو سره پای ته ورسېد.
د نشراتو او عامه اړیکو عمومي مدیریت
