د غزني پوهنتون د مالي او اداري چارو مرستیال د دغه ولایت د ټولو اداراتو د مسؤلینو لپاره د عقودو د نوي قانون اړوند په جوړ شوي درې ورځني سمینار کې ګډون وکړ.
د غزني پوهنتون د مالي او اداري چارو مرستیال الحاج شیخ عبدالهادي ذوالهادي د ولایت مقام د غونډو په تالار کې د اداري اصلاحاتو او ملکي خدمتونو له لوري د ټولو امارتي ادارو د مسؤلینو لپاره د عقودو د نوي قانون اړوند په جوړ شوي درې ورځني علمي او مسلکي سمینار کې ګډون وکړ.
دغه دری ورځنی سمینار چې مسؤلینو ته د عقودو د نوي قانون د اصولو، طرزالعملونو او عملي تطبیق په موخه جوړ شوی و، په ترڅ کې یې د قراردادونو د شفافیت، قانونمندۍ او اغېزمنتیا په اړه هر اړخیز معلومات وړاندې شول.
د سمینار پر مهال د اداري اصلاحاتو او ملکي خدمتونو د ادارې روزونکو د عقودو د نوي قانون مهم بدلونونه، عملي بېلګې او د پلي کېدو لارې چارې تشریح کړې، او ګډونوالو ته یې د پوښتنو او نظرونو د شریکولو زمینه هم برابره کړه.
په ورته مهال شیخ صاحب په دغه سمینار کې ګډون د پوهنتون د مالي او اداري سیستم د لا پیاوړتیا، د چارو د شفافیت او د قانوني میکانیزمونو د سم تطبیق لپاره مهم وباله، او ټینګار یې وکړ چې د ترلاسه شوو معلوماتو پر بنسټ به د پوهنتون په اړوندو چارو کې لازم پرمختګونه رامنځته شي.
د یادونې وړ ده چې دغه ډول روزنیز پروګرامونه د دولتي ادارو د ظرفیت لوړولو او د قانون د حاکمیت د پیاوړتیا لپاره اغېزمن رول لري.
د نشراتو او عامه اړیکو عمومي مدیریت
پنج شنبه ، ۲۷ جمادی الثاني ۱۴۴۷ هـ.ق— ۲۷ قوس۱۴۰۴ه ش
