د غزني پوهنتون د شرعیاتو پوهنځي محصلینو لهخوا تمثیلي محکمه وړاندې شوه.
ورځ: سهشنبه هجري قمري: ۱/جمادی الثاني/۱۴۴۶ هجري شمسي: ۱۳/قوس/۱۴۰۳ میلادي: ۳/ډیسمبر/۲۰۲۴ د غزني پوهنتون د شرعیاتو پوهنځي زدهکړیالانو په تمثیلي ډول جزایي محکمه دائره او یو تن یې محاکمه کړ. په همدې موخه جوړو شوو مراسمو ته د محصلانو چارو مرستیال انجنیر محمد عثمان وینا وکړه، او د دې ډول برنامو د ترسره کولو پر ارزښت یې خوښي څرګنده کړه او محصلان یې وهڅول، چې په داسې مراسمو کې د ګډون ترڅنګ د خپلو عملي زدهکړو لپاره ګټه ترې پورته کړي. ورپسې د شرعیاتو پوهنځي رئیس مولوي سراجالدین عمر منصور هم خپله خوښي څرګنده کړه، او د استادانو هڅې یې وستایلې او زیاته یې کړه چې علم د الله صفت دی؛ نو الله پاک دغه صفت پاکو خلکو ته ورکوي. هغه له محصلینو وغوښتل چې د رسول الله (ص) د قدمونو پلوي شي، او د هغه صفات په خپلو ژوندونو کې عملي کړي او خپل صورت او سیرت د شریعت په چوکاټ کې برابر کړي. وروسته د یاد پوهنځي محصلینو د تمثیلي محکمې په ترڅ کې یوه فرضي جزایي قضیه وڅېړله او یو فرضي متهم یې علنی محاکمه کړ. د محاکمې پایله دا وه چې متهم ته په فرضي ډول د شپږو میاشتو د بند سزا واورول شوه. په پای کې د پوهنتون عمومي رئیس الحاج مولوي عبدالواسع منصور د ترسره شوې محاکمې ارزونه وکړه. هغه د یادې محکمې مثبت ټکي په ګوته او وستایل. همدارنګه یې هغو برخو ته اشاره وکړه چې د تمثیلي محکمې لا ښکلا او موثریت لپاره باید ورته پاملرنه وشي.
د نشراتو او عامه اړیکو عمومي مدیریت
