د غزني پوهنتون د تضمین کیفیت د کیفیت لوړاوي کمېټې ناسته ترسره شوه؛ په دې ناسته کې د دوره یې فورمونو ډکولو پلان او طرزالعمل په اړه د بحث او خبرو اترو ترڅنګ لازمې پرېکړې وشوې.
۱۴۴۶هـ ق د رجب المرجب ۲۷مه
۱۴۰۳هـ ش د سلواغې ۹مه
۲۰۲۵م د جنورۍ ۲۸مه
نن ورځ د غزني پوهنتون د علمي چارو مرستیال مولوي محمد حیدر حمزه په مشرۍ د تضمین کیفیت د کیفیت لوړاوي کمېټې ناسته ترسره شوه. په دې ناسته کې د دوره یې فورمونو ډکولو پلان، طرزالعمل او یو شمېر نورو مهمو موضوعاتو باندې د بحث او خبرو ترو ترڅنګ لازمې پرېکړې وشوې.
ناسته د کلام الله په څو مبارکو آیاتونو سره پیل شوه، او د علمي چارو مرستیال ښاغلي حمزه د ناستې ګډونوالو ته د ښه راغلاست ترڅنګ اړینې سپارښتنې وکړې. نوموړي غوښتنه وکړه، چې خپلي ورځنۍ علمي چارې په منظمه توګه ترسره کړئ او د کمېټو اړوند کارونه او پرېکړې په خپل وخت او د اخلاص له مخې سرته ورسوئ.
وروسته د اجنډا له مخې د تېرې ناستې پرېکړو او مصوباتو ته لنډه کتنه وشوه. همدارنګه، د دوره یې فورمونو د ډکولو پلان او طرزالعمل، د شپږګونو پوهنځیو د ارزونې مهالوېش، د کلنۍ ارزونې راپورونو لپاره اړینې تیارۍ، او د پوهنتون د څلورو معاونیتونو د ارزونې په اړه بحث وشو او په اړوند یې پرېکړې وشوې.
ناسته په دعایې سره پای ته ورسېده.
د نشراتو او عامه اړیکو عمومي مدیریت
