د عالیقدر امیرالمؤمنین حفظه الله تعالی په ځانګړي شفقت د غزني پوهنتون طب او عامه ادارې او پالیسۍ پوهنځیو ته ۵۱ کادري او اداري بستونه منظور او ورکړل شول.
د غزني ولایت د جهاد پروره او کړاو ځپلو ولسونو سره د زیات ترحم، شفقت، پاملرنې او د غزني ولسونو ترڅنګ د ګاونډیو ولایتونو اوسېدونکو ته د معیاري روغتیایې خدماتو د برابرولو او طبي ستونزو د حل په موخه، د لوړو زده کړو وزیر شیخ الحدیث والتفسیر مولوي نداء محمد ندیم د زیاتو نه ستړي کېدونکو او پرلپسې هلو ځلو په لړ کې؛ د عالیقدر امیرالمؤمنین حفظهالله تعالی ورعاه له لوري، د غزني پوهنتون طب او عامه ادارې او پالیسۍ پوهنځیو ته شاوخوا ۵۱ علمي، کادري او اداري بستونه منظور او ورکړل شول.
په یادو بستونو کې د طب پوهنځي د اداري برخې ترڅنګ د اوو څانګو لپاره علمي کادري بستونه او د عامه ادارې،پالیسي پوهنځي د دوو څانګو لپاره اداري او علمي کادري بستونه شامل دي.
په ورته مهال د غزني پوهنتون مسؤلین دا ستر اقدام د لوړو زدهکړو د پراختیا او د بشري ظرفیت د لوړولو په لور یو مهم او پر وخت ګام بولي او د عالیقدر امیرالمؤمنین حفظه الله تعالی ورعاه؛ او د لوړو زده کړو وزارت له رهبرۍ څخه د دوامدارې پاملرنې او شفقت په موخه مننه کوي.
دا پرېکړه د اسلامي امارت د مشرتابه هغه ژمنتیا څرګندوي چې د هېواد په بېلابېلو ولایتونو کې د علم، تخصص او بشري سرچینو د ودې لپاره جدي ګامونه پورته کوي.
د یادونې وړ ده چې دغه پوهنځۍ په ۱۴۰۳ هـ ش کال کې د غزني پوهنتون په چوکاټ کې اضافه او په نېږدې راتلونکې کې به په فعالیت پیل وکړي.
د نشراتو او عامه اړیکو عمومي مدیریت
چهارشنبه ، ۱۰ رجب المرجب ۱۴۴۷ هـ.ق— ۱۰ جدې۱۴۰۴هـ ش
